هەر تاکێک ساڵانە لە هەرێمی کوردستان 37 کیلۆ برنج دەخوات

ئاڤا نیوز

 

بەکارهێنانی برج لەناوخۆی هەرێمی کوردستان زیادی کردووە؛ لەلایەکی دیکەوە تەنیا لە پارێزگای سلێمانی زیاتر لە 1200 تۆن برنج بەرهەمی خۆماڵی بەرهەم دەهێنرێت.

 

وێنە گەورەکە: ساڵانە لە گوندەکانی سەربە پارێزگای سلێمانی بە دەیان دۆنم مەرەزە دەچێندرێت، بە سەدان تۆن برنجی كوردی بەرهەم دەهێنرێت، بەرێوەبەرایەتی کشتوکاڵی سلێمانی ئەوەی نەشاردەوە کە تاوەکو ئێستا بە پێی پێویست نەیانتوانیوە هاوکاری جوتیاران بکەن، بۆیە ئێستا بەرهەمی برنجی خۆماڵی نەگەیشتوەتە ڕێژەیەک کە پێداویستی ناوخۆ پر بکاتەوە.

 

لەلایەکی دیکە: بەگوێرەی ڕاپۆرتێکی ڕێکخراوی خۆراک و کشتوکاڵی سەر بە نەتەوەیەکگرتووەکان، لە هەرێمی کوردستان تێکڕای بەکارهێنان و خواردنی برنج بۆ هەر تاکێک لەنێوان ساڵانی 2022 بۆ 2023نزیکەی 37 کیلۆگرام بووە، ئەمەش بە بەراورد وڵاتانی ناوچەکە و دەوروبەری رێژەیەکی بەرز تۆمار کراوە.

ئەمەش بزانە: ئەگەرچی برنجی خۆماڵی کوالیتیەکی زۆر بەرزی هەیە لە چاو برنجە هاوردەکراوەکانی هەرێمی کوردستان، بەڵام بەهۆی کەمی برنجی خۆماڵی و پرنەکردنەوەی پێداویستی ناوخۆیی و گرانی نرخەکەشی وای لە هاونیشتیمانیان کردووە بەرێژەیەکی زۆر بە بەراورد بە برنجی خۆماڵی روو لە برنجی وڵاتانی دەرەوە بکەن.