کارەبای حەوت گەڕەکی دیکەی هەولێر دەبێتە 24 کاتژمێری

ئاڤا نیوز

 

پرۆژەی ڕووناکی لە سەرتاسەری هەرێمی کوردستان بەردەوامە لە فراوانکاری لە تۆڕی کارەبای نیشتمانی 24 کاتژمێری، حەوت گەڕەکی دیکەی هەولێر هەڵسەنگاندنیان بۆ دەکرێت.

 
وێنە گەورەکە: لە چوارچێوەی فراوانکردنی پرۆژەی ڕووناکی، سبەی شەممە 30-11-2024، لە حەوت گەڕەکی دیکەی هەولێر هەڵسەنگاندن بۆ جێبەجێکردنی کارەبای 24 کاتژمیری دەکرێت.
 
زانیاریی بەدەستهاتوو: سەرچاوەیەک لە بەڕێوبەرایەتیی دابەشکردنی کارەبای یەکی هەولێر بە ئاڤا نیوزی ڕاگەیاند: تیمەکانی پڕۆژەکە لە گەڕەکەکانی شەهیدانی کوران، بەهاری کۆن، کرێکاران، کوردستان، نەسیج، کوران، ڕزگاری، دەست بە چاککردنی پێوەری کارەبای ماڵەکان دەکەن بۆ هەڵسەنگاندنی و جێبەجێکردنی پڕۆژەکە.
 
زانیاریی زیاتر: ئەو سەرچاوەیە باسی لەوەشکرد، لە کاتژمێر 8ی بەیانییەوە تاوەکو 5ی ئێوارە ئەو گەڕەکانە کارەبای نیشتمانی و مۆلیدەیان نابێت، تاوەکو تیمەکانی کارکردن بتوانن کارەکانیان ئەنجام بدەن.
 
ئەوەی پێویستە بیزانیت: بە فەرمانی سەرۆكوەزیران مەسرور بارزانی، پڕۆژەی ڕووناكی لە تەواوی هەرێمی كوردستان بە هاوتەریبی جێبەجێ دەکرێت، دەبێت لە ماوەی دوو ساڵدا سەرجەم دانیشتووانی هەرێمی کوردستان ببنە خاوەنی كارەبای 24 كاتژمێری.
 
ئەمەش بزانە: پێشتر کەمال محەممەد، وەزیری کارەبا بە ئاڤا نیوزی ڕاگەیاند: بە گشتی لە سەرانسەری هەرێمی کوردستان 77 هەزار هاوبەشی کارەبای 24 کاتژمێری هەن.