پەرلەمانی عێراق سێ پڕۆژە یاسای گرنگی خستە دەنگدانەوە

ئاڤا نیوز

 

ئەمڕۆ دووشەممە پەرلەمانی عێراق كۆبووەوە و لەمیانەدا گفتوگۆی چڕ و پڕ سەبارەت بە سێ پڕۆژە یاسای گرنگی پەیوەندیدار بە كورد و سوننە و شیعە كرا.
 

زانیاریی بەدەستهاتوو: لە كۆبوونەوەكەی ئەمڕۆی پەرلەماندا هەریەك لە پڕۆژە یاساكانی  هەمواری یاسای باری کەسی، پرۆژە یاسای گەڕاندنەوەی خاوەندارێتی موڵک و ماڵی داگیرکراو و هەموارکردنەوەی یاسای لێبوردنی گشتیی ژمارە 27ی ساڵی 2016 خرانە دەنگدانەوە.

 

لێدوانی فەرمی: سەباح سوبحی، پەرلەمانتاری فراكسیۆنی پارتی دیموكراتی كوردستان بە ئاڤا نیوزی ڕاگەیاند: لە كۆبوونەوەكەدا تەواوی بڕگەكانی هەرسێ پڕۆژە یاساكە خرانە دەنگدانەوە و دەنگیان لەسەر درا، ئەوەی ئێستا ماوە ئەوەیە كە هەر پڕۆژە یاسایەك بەتەواوی و تێكڕا بخرێتە دەنگدانەوە و دەنگی كۆتایی لەسەر بدرێت.

 

ئەوەی پێویستە بیزانیت: یەکەم: پرۆژەیاسای هەمواری یاسای باری کەسی، شیعە داوای پەسەندکردنی دەکات، پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە، کورد داوای پەسەندکردنی دەکات، هاوكات هەموارکردنەوەی یاسای لێبووردنی گشتیی ژمارە 27ی ساڵی 2016ـە، سوننە داوای پەسەندکردنی دەکات.