کۆبوونەوەی شاندی وەزارەتی کاروباری کۆمەڵایەتی لەگەڵ هاوتاکانیان لە بە‌غدا دەستپێدەکات

ئاڤا نیوز 

 

کۆبوونەوەکانی شاندی وەزارەتی کار و کاروباری کۆمەڵایەتی لە بەغدا دەستپێدەکەن و لەگەڵ دوو وەزیری عێراق سەبارەت بە چارەسەری مووچەی خاوەن پێداویستییە تایبەتەکان کۆدەبنەوە، چاودێریی خێزان و  چاکسازیی کۆمەڵایەتی گفتوگۆ دەکەن.

 

وێنە گەورەکە: شاندێکی وەزارتی کار و کاروباری کۆمەڵایەتیی هەرێمی کوردستان کە لە حەوت کەس پێکهاتوون، دوو ڕۆژە بۆ دروستکردنی هەماهەنگی و چارەسەرکردنی کێشەی مووچەی خاوەن پێداویستییە تایبەتەکان و چەند پرسێکی دیکە لە بەغدان، ئەمڕۆ دوو کۆبوونەوە لەگەڵ ئەحمەد ئەسەدی، وەزیری کار و کاروباری کۆمەڵایەتی و خالید شوانی، وەزیری دادی عێراق دەکەن ئێوارە دەگەڕێنەوە هەرێمی کوردستان.

 

ئامانجی شاندەکە چییە؟ شاندی هەرێمی کوردستان بە سەرۆکایەتیی کوێستان محەممەد، وەزیری کار و کاروباری کۆمەڵایەتی، تاوتوێی بەستنی مووچە بۆ 13 هەزار و 200 خاوەنپێداویستی و هاوتاکردنی مووچەکانیان لەگەڵ خاوەن پێداویستە تایبەتەکانی عێراق و دەستپێکردنەوەی هاوکاریی چاودێریی کۆمەڵایەتی و دابینکردنی سەبەتە خۆراکی مانگانە بۆ خێزانە کەمدەرامەتەکان، لەپاڵ تاوتوێکردنی دۆخی چاکسازییەکانی هەرێمی کوردستان و چارەسەرکردنیان لە ئەجێندای کۆبوونەوەکانیان دەبن.

 

لێدوانی فەرمی: یوسف چاوشین، ئەندامی شاندەکە بە ئاڤای گوت، "ئەوەی پەیوەندی بە مووچەی خاوەن پێداویستییە تایبەتەکان و چاودێری خێزانەوە هەبێت، لە گەڵ شاندی وەزارەتی کاری عێراق باس دەکرێت، هەروەها چەند بابەتێکی پەیوەست بە بەڕێوەبەرایەتی گشتیی چاکسازیی کۆمەڵایەتیی هەرێمی کوردستان، لەگەڵ شاندی وەزارەتی داد گفتوگۆی لەسەر دەکرێت."