پرۆسەی تاپۆکردنی زەویی فەرمانبەران دەستپێدەکات

ئاڤا نیوز 

 

ئەو فەرمانبەرانەی لە قۆناغی یەکەمدا زەوییان بۆ دەرچووە، دەبێت لە ماوەی 10 ڕۆژ ڕێککارەکانی خاوەندارییەتی زەوی دەستپێبکەن و بۆ شارەوانییەکانی بگەڕێننەوە.

 

وێنە گەورەکە: وەزارەتی شارەوانی و گەشتوگوزار زیاتر لە 300 هەزار پارچە زەوی لەسەرجەم ناوچەکانی هەرێمی کوردستان بەسەر فەرمانبەر و خانەنشینان دابەشدەکات، لە قۆناغی یەکەمدا زیاتر لە 15 هەزار کەس سوودمەند بوون و ئێستا مامەڵەی خاوەندارێتی زەوییەکان دەکەن.

 

لێدوانی فەرمی: کارزان هادی، بەڕێوەبەری شارەوانیی هەولێر بە ئاڤا نیوزی گوت،  "ئەو کەسانەی زەوییان بۆ دەرچووە دەبێت کۆمەڵێک بەڵگەنامە و پێداویستی پێشکەش بکەن، بۆ کردنەوەی فایلی خاوەندارێتییان لەسەر ئەو زەوییەی پێیاندراوە، تاوەکو 20-12-2024 دەرفەتیان لەبەردەمە بۆ پێشکەشکردن."

 

ئەوەی پێویستە بیزانیت: پێداویستی و بەڵگەنامەکان پێکهاتوون لە:-

1. ناسنامە یان کارتی نیشتیمانی ( فەرمانبەر + هاوسەر) و وێنەی ئەسڵی.
2.  کۆپی ناسنامە ( فەرمانبەر + هاوسەر) هەردوو ڕووی لە یەک ڕوو بکرێت بە شێوەی ڕەنگاوڕەنگ.
3. ژمارەی مۆبایلی سوودمەندبوو.
4. پشتگیری ئەو فەرمانگەیەی کاری لێدەکات.
5. فەرمانبەری سەڵت دەبێت فۆڕمی خۆراک و کارتی نیشتیمانی خۆی لەگەڵ کارتی نیشتیمانی ( دایک یان باوک یان برا گەورە، ئەگەر ئەمانەی نەبوو برایەک  یان خوشکێکی کە هاوسەرگیری نەکردبێت)  لەگەڵ خۆی ببات. 
6. ئەوانەی لە هاوسەرەکانیان جیابوونەتەوە پێویستە وێنەیەکی کۆپی ڕەنگاو ڕەنگ لەگەڵ (تەلاق نامه) پێشکەش بکەن.