ئاڤا بەدواداچوون بۆ کێشەی مووچەی پاسەوانانی خولی ڕابردووی پەرلەمان دەکات

ئاڤا نیوز

 

لە خولی پێنجەمی پەرلەمانی كوردستان حكومەت بڕیاری دا، لەمەودوا پاسەوانانی پەرلەمان بەشێوەی گرێبەست دابمەزرێن نەك هەمیشەیی و لەدوای تەواوبوونی خولەكە كۆتایی بە كار و ئەرك و گرێبەستی پاسەوانەكان بهێنرێت.

 

وێنە گەورەکە: هەر پەرلەمانتارێك سێ پاسەوانی هەیە و دوای تەواو بوونی خولی ڕابردوو سەرجەم پاسەوانەكان كە ژمارەیان 330 كەسە، نێردراونەتەوە ماڵەوە، پاش ساڵێك و هەشت مانگ بانگیان كردوون و پێیان داوایان لێکردوون ببن بە پۆلیس و لە بەڕێوەبەرایەتیی بەرگریی شارستانی دەوام بكەن، هەر یەكەیان بەپێی شوێنی نیشتەجێبوونەكەی لە بنكەیەكی ئاگركوژێنەوە دەستبەكاربووە.

 

بابەتە ستراتیژییەکە: نوێنەری ئەو 330 پۆلیسە لەڕێگەی ئاڤاوە داوای چارەسەکردنی کێشەکانیان دەکەن و دەڵێن ئێمە دوو مانگ و 14 ڕۆژە دەوام دەكەین، بەڵام پێمان وتراوە کە مووچەی مانگەكانی 10 و 11 و 12تان پێنادرێت و دەفەوتێت.

 

لێدوانی فەرمی: لیوا یادگار ئەنوەر فەرج، بەڕێوەبەری گشتی بەرگریی و شارستانی بە ئاڤای ڕاگەیاند: ئەو پۆلیسانە بە گرێبەستی ساڵێك لە بەڕێوەبەرایەتیی بەرگریی شارستانی دامەزراون و بەپێی شوێنی نیشتەجێبوونیان بەسەر ناوچە جیاوازەكان دابەشكراون.

 

لیوا یادگار ئاماژە بەوەش دەکات، ئەو پۆلیسانە لە 1ی 10ی ئەمساڵەوە دەستبەكاربوونە و بە بڕیاری وەزارەتی دارایی ئەوانەی لەو ڕێکەوتە دەستبەكاربوونە، مووچەیان نافەوتێت و پێیان دەدرێت، بەڵام مووچەی مانگەكانی 10 و 11 و 12 لە مانگی 1ی ساڵی داهاتوو هەمووی بەیەكەوە بۆیان دەبەسترێت و وەریدەگرن و یەك دیناریشیان نافەوتێت.

 

زانیاریی زیاتر: ئەو 330 كەسە هەموو ماف و ئیمتیازاتێكی پۆلیسیان پێدەدرێت، گرێبەستەكەیان بۆ ماوەی ساڵێكە بەڵام  دوای ئەو ساڵە بە فەرمی دەبنە پۆلیس و دەبنە هەمیشەیی.