ئەمریکا پێگەی حووسییەکان لە سەنعا بۆردوومان دەکات

ئاڤا نیوز

 

لە ئێوارەی ڕۆژی شەممەوە، سوپای ئەمریکا هێرشی ئاسمانییان کردووەتە سەر ناوەندنی هەڵگرتنی مووشەک و دامەزراوەیەکی فەرماندەی و کۆنتڕۆڵی حووسییەکان لە سەنعای پایتەختی یەمەن. 

 

چیرۆکی سەرەکی: ڕۆژی ڕابردوو حووسییەکان بە مووشەک ناوەڕاستی تەلئەڤیڤیان کردە ئامانج و بەهۆیەوە 16 کەس برینداربوون، لە ئێوارەی هەمان ڕۆژدا ئەمریکا چەند پێگەیەکی ئەو گرووپە چەکدارییەی لە ناو خاکی یەمەن بە ئامانج گرت. 

 

ڕاگەیێنراوی فەرمی: فەرماندەیی ناوەندیی ئەمریکا(سێنتکۆم) لە بەیاننامەیەکدا ڕایگەیاند:
•    ئامانجی هێرشەکە لەکارخستن و لاوازکردنی ئۆپەراسیۆنەکانی حوسییەکانە لەوانەش، هێرشکردنە سەر کەشتییە جەنگی و بازرگانییەکانی ئەمریکا لە باشووری دەریای سوور و گەرووی بابولمەندب و کەنداوی عەدن.
•    چەندین فڕۆکەی بێ فڕۆکەوانی حوسییەکان و مووشەکی کرووزی دژە کەشتی لە دەریای سوور کراونەتە ئامانج.
•    ئەم هێرشانە پابەندبوونی بەردەوامی سێنتکۆمە لە پاراستنی کارمەندە ئەمریکییەکان و هاوبەشە هاوپەیمانەکان، جگە لە هاوبەشە ناوچەییەکان و پاراستنی کەشتیوانیی نێودەوڵەتی.

 

گۆشەیەکی دیکە: ڕۆژی پێنجشەممە ڕێککەوتنی 2024\19\12، حووسییەکان بە دوو مووشەکی بالیستیک ئیسرائیلیان بۆردوومانکرد، ئەمەش وەکو کاردانەوەیەک بۆ هێرشکردنە سەر چەند ئامانجێکی سەربازیی ئەو گرووپە لە لایەن ئیسرائیلەوە.