کار بۆ بنبڕکردنی هاوسەرگیریی پێشوەختە لە هەرێمی کوردستان دەکرێت

ئاڤا نیوز

 

ئاماری مارەبڕین و لێکجیابوونەوە لە دادگاکانی سنووری پارێزگای هەولێر ئەوەمان پێ دەڵێن کە ڕێژەی هاوسەرگیری پێشوەختە لە هەولێر 13% ـەیە و بەراورد بە دوو ساڵی ڕابردووو ڕێژەکە 14% کەمیکردووە.

 

وێنە گەورەکە: ڕێکخراوی لێکۆڵەر بۆ سەروەری یاسا بە هەماهەنگی لەگەڵ نەتەوە یەکگرتووەکان و کونسوڵخانەی بەریتانیا لە هەرێمی کوردستان، پڕۆژەی کەمکردنەوەی دیاردەی بەشوودانی پێشوەختەی لە هەرێمی کوردستان دەستپێکردووە کە ئامانج لێی بڵاوکردنەوەی هۆشیاری یاسایی و دەروونییە بۆ سنووردارکردنی زوو بەشوودانی خانمان.

 

لێدوانی فەرمی: دکتۆر ئەحمەد میران، سەرۆکی ئەنجوومەنی ڕێکخراوی لێکۆڵەر بۆ سەروەری یاسا بە ئاڤا میدیای ڕاگەیاند: لەماوەی ڕابردوودا چەندین خولی هۆشیاری یاساییمان بۆ مامۆستایانی ئایینی و بەشێک لە خانمە قوتابیانی ئامادەییەکان و ڕێنماییکارانی پەروەردەیی و دادوەرانی باری کەسی و چین و توێژەکانی دیکەی کۆمەڵگە ئەنجامدا، بەمەبەستی هۆشیارکردنەوەی هاووڵاتیان لە زیانەکانی هاوسەرگیریی پێشوەختە و توانیمان توێژینەوەیەکی مەیدانی لەبارەی هۆکار و لێکەوت و ئامارەکانی ئەو دیاردەیە ئامادە بکەین.

 

گرفتەکە چییە: پەرلەمانی عێراق ئێستا سەرقاڵی هەموارکردنەوەی یاسای باری کەسێتییە کە بەگوێرەی بڕگەیەکی هەمواری یاساکە؛ تەمەنی بەشوودانی خانمان بۆ 9 ساڵ کەمکراوەتەوە، ئەمەش چەندین لێکەوتی نەرێنی و خراپی بۆ سەر لایەنی دەروونی و کۆمەڵایەتیی تاک و خێزان و کۆمەڵگە دەبێت.

 

ئەوەی پێویستە بیزانیت: مەبەست لە هاوسەرگیریی پێشوەختە سەرجەم ئەم گرێبەستە هاوسەرگیرییانە دەگرێتەوە کە لایەنێک لە پرۆسەکە چ کوڕ چ کچ، تەمەنیان لە خوار تەمەنی یاسایی پێگەیشتن کە بە 18 ساڵ دیاریکراوە، بەگوێرەی دەسەڵاتی هەڵسەنگاندنی دادوەر پرۆسەی هاوسەرگیرییەکە پەسەندکراوە.

 

ژمارەکان وا دەڵێن: ساڵی ڕابردوو لە سنووری پارێزگای هەولێر لە کۆی 17 هەزار و 543 پرۆسەی هاوسەرگیری کە لە دادگاکان کراون، دوو هەزار و 198 گرێبەستی هاوسەرگیریی خوار تەمەنی یاسایی بووە کە دەکاتە 13%ی کۆی ئەو هاوسەرگیرییانەی پەسەندکراون. 

ئەوەش بزانە: هاوکات لەکۆی تۆمارکردنی پێنج هەزار و 857 حاڵەتی جیابوونەوە، هەزار و 90 حاڵەتی جیابوونەوە هی ئەو هاوسەرگیرییانە بووە کە بەشێوەی پێشوەختە هاوسەرگیرییان کردووە، واتە ڕێژەی 19%ـی کۆی حاڵەتەکان بووە.