مەزڵوم عەبدی و شاندێکی ئەنەکەسە کۆدەبنەوە

ئاڤا نیوز

 

بە مەبەستی یەکخستنی لایەنە کوردییەکانی ڕۆژئاوای کوردستان و چوونیان بۆ دیمەشق بە یەک پاکێج، ئەنەکەسە و مەزڵوم عەبدی کۆ دەبنەوە.

 

وێنەگەورەکە: ئەمڕۆ دووشەممە، 23-12-2024، شاندێکی ئەنجوومەنی نیشتمانیی کورد لە سووریا 'ئەنەکەسە' لەگەڵ مەزڵوم عەبدی، فەرماندەی گشتیی هێزەکانی سووریای دیموکرات 'هەسەدە' لە شاری حەسەکە، کۆدەبنەوە.

 

 لێدوانی فەرمی: جەدعان عەلی، سەرۆکی نوێنەرایەتیی ئەنەکەسە لە هەرێمی کوردستان، بە ئاڤا نیوزی گوت: دوایین پێشهاتەکانی سووریا، پاراستنی ناوچە کوردییەکان و یەکخستنی حزبە کوردییەکانی ڕۆژئاوای کوردستان بۆ دانوستانەکانی دیمەشق، تەوەرەکانی کۆبوونەوەکە دەبن.

 

زانیاریی زیاتر: کۆبوونەوەکە دوای ئەوە هات کە هەریەک لە، ئەمریکا، بەریتانیا و فەرەنسا گوشارەکانیان لەسەر هێزە کوردییەکانی باکورو ڕۆژهەڵاتی سووریا  زیاتر کردووە تا بەیەک شاند و گوتارێکی یەکگرتووی بەرەو دیمەشق بەرێبکەون.

 

ئەوەی پێویستە بیزانیت: کۆبوونەوەکەی ئەنەکەسە و مەزڵوم عەبدی لەژێر سەرپەرشتیی ڕاستەوخۆی ئەمەریکا بەڕێوە دەچێت.