زێلینسکی لەبارەی کۆریای باکوور داوایەک لە چین دەکات

ئاڤا نیوز

 

سەرۆکی ئۆکراینا داوا لە چین دەکات کاریگەری خۆی لەسەر کۆریای باکوور بەکاربهێنێت بۆ ڕاگرتنی ناردنی سەربازی زیاتر بۆ بەرەکانی شەڕی نێوان ئۆکراینا و ڕووسیا.

 

وێنە گەورەکە: کۆریای باکوور بۆ پشتیووانی سووپای ڕووسیا و لە چوارچێوەی ڕێککەوتنێکدا لە ماوەی ڕابردوو بە هەزاران سەرباز و چەکی پێشکەوتووی ڕەوانەی ئەو وڵاتە کردووە بۆ شەرکردن دژی ئۆکراینا.

 

لێدوانی فەرمی: ڤۆلۆدیمێر زێلینسکی، سەرۆکی ئۆکراینا ڕایگەیاند، ئەگەر چین لە لێدوانەکانیدا دڵسۆز بێت کە نابێت شەڕی ڕووسیا و ئۆکراینا  پەرەبستێنێت، ئەوا پێویستە فشار بخاتە سەر پیۆنگ یانگ، چونکە چین نزیکترین هاوپەیمانی کۆریای باکوورە بۆ ڕاگرتنی سەرباز بۆ بەرەکانی شەڕ.

 

لەلایەکی دیکەوە: جۆن کێربی، وتەبێژی کۆشکی سپی سەبارەت بە زیانەکانی سەربازانی کۆریای باکوور بە ڕۆژنامەنووسانی ڕاگەیاند، هێزەکانی کۆریای باکوور لە بەرەکانی پێشەوەی شەڕی ڕووسیا دژی ئۆکرانیا زیانێکی زۆری مرۆیییان بەرکەوتووە، بەجۆرێک تەنیا لە هەفتەیەکدا 1000 سەربازیان لە بەرەکانی پێشەوەی شەر لە کۆرسک کوژراون و برینداربوون.