جووڵەی بازرگانی لە دەروازەی کێلێ وەستاوە

ئاڤا نیوز

 

بەهۆی بەفربارینەوە ڕێگای سەرەکی دەروازەی کێلێ داخراوە و جووڵەی بازرگانی لە نێوان هەرێمی کوردستان و کۆماری ئیسلامی ئێران لەو سنوورە بە تەواوی وەستاوە. 

 

چیرۆکی سەرەکی: تاوەکو ئێستا بەفربارین لە ناوچە سنوورییەکانی قەزای پشدەر بەردەوامە، بەهۆیەوە جووڵەی بازرگانی لەو سنوورە بە تەواوی پەکی کەوتووە و هیچ بارهەڵگرێکیش ناتوانێت جووڵە بکات.

 

لێدوانی فەرمی:  عەباس عەزیز، بەڕێوبەری گومرگی ڕاپەڕین، بەئاڤا میدیای ڕاگەیاند: لەماوەی پێنج کاتژمێری ڕابردوودا نزیکەی 20 سانتیمەتر بەفر لە مەرزی کێلێ باریوە و ئەمەش بووەتە هۆی داخستنی ڕێگاکە بەڕووی هاتووچۆی بارهەڵگرەکاندا.

 

بەڕێوبەری گومرگی ڕاپەڕین باسی لەوەشکرد: ماوەی سێ مانگە هیچ بڕە پارەیەک بۆ ئەو کۆمپانیایە تەرخان نەکراوە کە ئەرکی خاوێنکردنەوەی دەروازەکەی لە ئەستۆیە، ئەمەش بووەتە هۆی داخستنی دەروازەکە بەڕووی هاتوچۆی بازرگانیدا.

 

باکگراوند: دەروازەی کێلێ دەروازەیەکی سنوورییە لە نێوان هەرێمی کوردستان و ئێران، ڕۆژانە سەدان بارهەڵگر کەرستەی بیناسازی و ماددەی پاککەرەوە و چەندین جۆر کەلوپەلی دیکە ئاڵوگۆڕ دەکەن لەگەڵ بوونی هاتووچۆی گەشتیاریش.