مەزڵوم عەبدی: داعش پلان بۆ شکاندنی گرتووخانەکان دادەنێت

ئاڤا نیوز

 

فەرماندەی گشتیی هێزەکانی سووریای دیموکرات - هەسەدە هۆشداری لە مەترسیی سەرهەڵدانەوەی داعش لە سووریا دەدات و دەڵێت: ئەو ڕێکخراوە دەیەوێت بۆشایی ئەمنی بۆ بەهێزبوونەوەی خۆی بەکاربهێنێت.

 

وێنە گەورەکە: ڕۆژی دووشەممە 13-1- 2025، فەرماندەی گشتیی هێزەکانی هەسەدە، چاوپێکەوتنێکی لەگەڵ ڕۆژنامەی زە سەنی بەریتانی کرد، هۆشداریی توندی لە بەهێزبوونەوەی داعش لە سووریا و دروستکردنی مەترسیی جددییان بۆ وڵاتەکە وهەموو جیهان دا.

 

لێدوانی فەرمی: مەزڵوم عەبدی، فەرماندەی گشتیی هێزەکانی سووریای دیموکرات - هەسەدە لە چاوپێکەوتنەکەی دا دەڵێت: داعش و گرووپەکە جیهادییەکان پلان دادەنێن بۆ ئەوەی گرتووخانەکان بشکێنێن و هێرش بکەنە سەر ڕۆژئاوای کوردستان و ناوچەکە، بۆ ئەو مەبەستە هەوڵەکانییان بۆ ئازادکردنی زیندانییەکانییان چڕترکردووەتەوە.

 

ئەوەی پێویستە بیزانیت: پێشتر چەند چەکدارێکی داعش لە زیندانەکان هەڵاتوون و چوونەتە نێو سوپای نیشتمانیی سووریا و دەستەی تەحریرولشام.

 

کاریگەری و لێکەتەکان: مەزڵوم عەبدی باسی لەوە کرد، داعش نەک تەنیا بۆ سووریا، بەڵکوو هێشتا مەترسییەکی جدییە لەسەر هەموو جیهان.  دەشڵێت، نزیکەی 60 هەزار چەکداری داعش و ئەندامانی خێزانەکانیان لە کەمپەکانی هۆڵ و ڕۆژ ڕاگیراون.

 

لەلایەکی دیکە: ڕۆژی دووشەممە، جۆ بایدن، سەرۆکی ئەمریکا لە بارەگای وەزارەتی دەرەوەی وڵاتەکەی گوتارێکی پێشکەشکرد و داوای لە  ئیدارەی داهاتووی ترەمپ کرد،  بەهیچ شێوەیەک ڕێگە نەدات دوای نەمانی ئەسەد، داعش سەرهەڵبداتەوە و دڵنیایی بدات لەوەی کە داعش لە سوریا و ناوچەکە نەبێتەوە مەترسیی.