کۆڕبەندی داڤۆس هەلی وەبەرهێنان لە هەرێمی کوردستان زیاد دەکات

ئاڤا نیوز

 

لە داڤۆس کۆربەندی هاوکاری بۆ سەردەمی زیرەک دەکرێت و کارەکانی دەستیپێکردووە، لەو چوارچێوەیەدا سەرۆکوەزیران مەسرور بارزانی و دەیان سەرکردە و سەرۆکی وڵاتان بەشدار دەبن.

 

وێنە گەورەکە: لە کۆڕبەندی داڤۆس، بڕیاردەران، دروستکەرانی بڕیار، دەستپێشخەرانی کار، وەبەرهێنەر و گەورە ناوەندەکانی لێکۆڵینەوەی سیاسی و ئابووری لەسەر ئاستی جیهان بەشدارن، هاوکات شاندێکی حکومەتی هەرێمی کوردستان و 11 وەبەرهێنەر بە سەرپەرشتیی سەرۆکوەزیران مەسرور بارزانی، دیدار و دانیشتنی تایبەتیان لە کۆڕبەندەکە دەبێت.

 

لێدوانی فەرمی: د. ئاراس خۆشناو، سەرۆکی سەنتەری زانیاری و لێکۆڵینەوەی ستراتیژی کوردستان بە ئاڤا میدیای ڕاگەیاند: کۆربەندی داڤۆس دەبێتە دەروازەیەکی ئابووری بۆ هەرێمی کوردستان، هاوکات هەرێمی کوردستان پێویستیی بە وەبەرهێنانی بیانی هەیە، پێویستە گەنج و لاوان سوود لە ئابووری هەرێمی کوردستان وەرگرن.

 

لەلایەکی دیکەوە: پێشتر بەرگەشت ئاکرەیی، وتەبێژی دەستەی وەبەرهێنانی حکومەتی هەرێمی کوردستان بە ئاڤا میدیای ڕاگەیاند: زیاتر لە 50 پرۆژەی وەبەرهێنانی بیانی بە گوژمەی زیاتر لە 11 ملیار دۆلار مۆڵەتی کارکردنیان لە هەرێمی کوردستان هەیە و پرۆژەکان لە سێکتەرە جیاوازەکاندا ئەنجام دراون.

 

زانیاریی زیاتر: وەبەرهێنەرانی تورکیا نزیکەی 20 پرۆژەی وەبەرهێنانیان لە هەرێمی کوردستان هەیە، سەرمایەی بەگەڕخراویان نزیکەی دوو ملیار دۆلارە، هاوکات وڵاتی ئیمارات زۆرترین سەرمایەی بەگەڕ خستووە کە بە سێ پرۆژە زیاترە لە دوو ملیار و 500 هەزار دۆلاریان بەگەڕ خستووە.