لەبارەی پێدانی زەوی بە سەربازانی کورد لە ڕیزەکانی سوپای عێراق بڕیاردرا

ئاڤا نیوز

وەزیری بەرگریی عێراق ڕایگەیاند، ئەو سەربازە کوردانەی کە خەڵکی هەرێمی کوردستانن و لە ڕیزەکانی سوپادان، لە پارێزگاکانی دیکەی عێراق زەوییان پێدەدرێت و لەو مافەیان بێبەش ناکرێن.

چیرۆکی سەرەکی: کۆتایی ساڵی ڕابردوو ئەنجوومەنی وەزیرانی عێراق بڕیاریدا زەوی بداتە کارمەندانی وەزارەتی بەرگری، لەوانەش سەرباز، ئەفسەر، پلەدار و فەرمانبەران، بڕیاریشیدا وەزارەتی بەرگری خۆی سەرپەرشتی دابەشكردنی پرۆسەکە لە بەغدا و پارێزگاکان بکات.

لێدوانی فەرمی: سابت عەباسی، وەزیری بەرگریی عێراق دوێنێ لەمیانەی پرۆسەی دابەشکردنی زەوی لەناوچەی بەسمایەی بەغدا ڕایگەیاند:

- لەبارەی پارێزگاکانی هەرێمی کوردستان ئێمە ناتوانین لە شوێنی خۆیان زەوییان بۆ تەرخان بکەین، لە پارێزگاکانی هەرێم یاسا و ڕێنمایی هەیە، بۆیە (سەربازە کوردەکان) لە پارێزگاکانی دیکە زەوییان پێدەدرێت لەوانەش بەغدا، ئێستا تاوتوێی بڕیارەکە دەکەین کە زیانمەندبووانی برا و ڕۆڵەکانی کوردمان بگرێتەوە لەو پارێزگایانەی کە ئێمە زەوی زیادەمان هەیە تا لەوێ پێیان بدرێت لەناویشیاندا لە بەغدا، ئامانجی ئێمە و حکومەتەکەشمان ئەوەیە هەموو ئەو عێراقییانەی شایستەن شوێنی شیاوی خۆیان پێبدرێت.

بەشێکی دیکە لە قسەکانی وەزیری بەرگریی عێراق:

- لە بەغدا 130 هەزار پارچە زەویمان هەیە و لەکاتی دابەشكردنی زەویدا خێزانی شەهیدان و بریندارەکان لەپێشینەن، دواتریش پرۆسەکە لە بەسڕە و نەینەوا و نەجەف و پارێزگاکانی دیکە دەستپێدەکات.

- هەر ئەندامێکی وەزارەتی بەرگری لەدایکبووی بەغدا بێت یان 10 ساڵ بێت لێرە بژی، لە بەغدا زەوی پێدەدرێت.

- بەڵێنیتان پێدەدەم لە ساڵی 2025دا هەموو ئەوانەی بەگوێرەی یاسا، مافی وەرگرتنی زەوییان هەیە لەهەر پارێزگایەک بن، زەوییان پێدەدرێت.

- بەر لەوەی زەوییەکان دابەش بکەین، دەمانەوێت پڕۆژە خزمەتگوزارییەکان بۆ زەوییەکان دابین بکەین، بۆیەش گرێبەستمان لەگەڵ کۆمپانیایەک کردووە و لە ئەمڕۆوە دەست بەدروستکردنی ڕێگاوبان و قوتابخانە و پڕۆژەکانی دیکە دەکات.

ڕاگەیێنراوی فەرمی: بەگوێرەی نوسراوێکی وەزارەتی بەرگریی عێراق دابەشکردنی زەوی بەسەر ئەندامانی وەزارەتەکە بەم شێوەیە دەبێت:

- ئەوانەی پلەکانیان لیوا، فەریق، فەریقی یەکەم و فەرمانبەرانی پلەکانی سووپەر A و سوپەر B ـیە، 400 مەتر زەوییان پێدەدرێت.

- ئەوانەی پلەکانیان لە نێوان ملازم تا عەمیدە لەگەڵ ئەو فەرمانبەرانەی پلەکانیان 1 و 2 و 3ـیە، 300 مەتر زەوییان پێدەدرێت.

- سەربازەکان و ئەو فەرمانبەرانەی پلەکانیان لە چوار بۆ خوارەوەیە، 200 مەتر زەوییان پێدەدرێت.