تەقینەوەکەی بەغدا داعش بوو یان هەڵەی تەکنیکی؟

ئاڤا نیوز

داعش بەرپرسیاریێتی خۆی لە تەقینەوەکەی قەزای تارمیەی باکووری بەغدا ڕاگەیاند کە بووە هۆی کوژران و برینداربوونی ژمارەیەک ئەفسەر و سەربازانی سوپا و ئاسایشی نیشتمانیی عێراق، کاربەدەستێکی عێراقیش دەڵێت ئەو ڤیدیۆیەی داعش بڵاویکردووەتەوە کۆنە.

چیرۆکی سەرەکی: ڕۆژی چوارشەممە 2025-1-22، لە قەزای تارمیە لە باکووری بەغدا کۆگایەکی چەک و تەقەمەنی بە هێزەکانی سوپاو ئاسایشی نیشتمانیی عێراقدا تەقییەوە بە هۆیەوە سێ ئەفسەر لەنێویاندا بەڕێوەبەری ئاسایشی نیشتمانی و سەربازێک کوژران و چوار ئەندامی دیکەی ئەو هێزانە برینداربوون.

ئەوەی لەبارەیەوە دەگوترێت: شانەی ڕاگەیاندنی ئەمنیی عێراق ڕایگەیاند: تەقینەوەکە بەهۆی هەڵەیەکی تەکنیکیەوە بووە لەکاتی مامەڵەکردن لەگەڵ تەقەمەنییەکان و ڕوونیشیکردەوە لیژنەیەکی لێکۆڵینەوە بۆ دیاریکردنی هۆکاری ڕووداوەکە پێکهێنراوە.

گۆشەیەکی دیکەی دیمەنەکە: بڵاوبوونەوەی گرتەیەکی ڤیدیۆیی لەلایەن داعشەوە کە تێیدا ساتی بە ئامانجگرتنی هێزە عێراقییەکە لە قەزای تارمیە پێشان دەدات و ڕاگەیاندنی بەرپرسیاریێتی خۆی لە هێرشەکە، کاردانەوەی زۆری بەدوای خۆیدا هێنا.

بۆچوونی لایەنی بەرامبەر: کاربەدەستێک لە ئاسایشی عێراقی کە قسەی بۆ میدیای عێراقی کردووە، ئاماژە بۆ ئەوە دەکات ئەو گرتە ڤیدیۆییەی داعش کە بەم دواییانە بڵاوکرایەوە لە قەزای تارمییەی بەغدای پایتەخت "کۆنە و پەیوەندی بەو ڕووداوەی ئێستاوە نییە".