عێراق: ئامادەین نێوەندگیریی لەنێوان ڕووسیا و ئۆکراینا بکەین

ئاڤا نیوز

 

وەزیری دەرەوەی عێراق ئامادەیی وڵاتەکەی بۆ نێوەندگیری لەنێوان ڕووسیا و ئۆکراینا دەردەبڕێت، هەروەها ئاشکرای دەکات کە ئەمریکا داوای لێبووردنی لە عێراق کردووە بەهۆی ئاگادارنەکردنەوەیان لە هێرشەکانی ئەم دواییەی سەر گرووپە چەکدارەکان. 

 

لێدوانی فەرمی: فوئاد حوسێن، وەزیری دەرەوەی عێراق بە هەردوو ئاژانسی هەواڵی نۆڤۆستی و سپۆتنیکی ڕووسی ڕاگەیاند: ئەگەر مۆسکۆ و کیێڤ داوامان لێبکەن، عێراق ئامادەیە بۆ نێوەندگیری لەنێوان ڕووسیا و ئۆکراینا. 

 

لەلایەکی دیکەوە: سەبارەت بە هێرشەکانی ئەمریکا لە 2ـی مانگی شوباتی ڕابردوو فوئاد حوسێن گوتی: بەهۆی ئەوەی پێش هێرشەکان واشنتن عێراقی ئاگادار نەکردبوویەوە، بەرپرسێکی ئەمریکی هات و داوای لێبووردنی لێکردین.

 

وێنە گەورەکە: عێراق لەنێو ئەو تیمی پەیوەندییە بوو کە کۆمکاری عەرەبی پێکهێنا لە ئاداری 2022 بۆ نێوەندگیری لەنێوان ڕووسیا و ئۆکراینا، لە مۆسکۆ لەگەڵ سێرگی لاڤرۆڤ وەزیری دەرەوە کۆبووینەوە، لە وارشۆش لەگەڵ وەزیری دەرەوەی ئۆکراینا، پێشنیازی نێوەندگیریمان کرد، بەڵام ئەو کاتە دۆخەکە سەخت بوو.