مامۆستایان و فەرمانبەرانی پەیمانگەی تەکنیکی خەبات بایکۆتی دەوام دەکەن

ئاڤا نیوز

دوای خانەنشینبوونی ڕاگری پەیمانگەی تەکنیکی خەبات، مامۆستایان و فەرمانبەران لەڕێگەی یاداشتێکەوە داوایەک لە سەرۆکی زانکۆی پۆلیتەکنیکی هەولێر دەکەن.

چیرۆکی سەرەکی: مامۆستایان و فەرمانبەرانی پەیمانگەی تەکنیکی خەبات بڕیاری بایکۆتیان داوە و دەرگاکانی خوێندن بەڕووی قوتابییەکاندا ناکەنەوە، هاوکات داوای جێبەجێکردنی داواکارییەکەیان دەکەن کە دانانی کەسێکی سنوورەکەیە لەجێگەی ڕاگر.

لێدوانی فەرمی: د. مەولود خضر، یاریدەدەری ڕاگری پەیمانگەی تەکنیکی خەبات بە ئاڤا میدیای ڕاگەیاند: مامۆستایان و فەرمانبەرانی پەیمانگەکە بڕیاریان داوە بایکۆتی دەوام بکەن، تاوەکو کەسێکی سنووری خەبات بە ڕاگری پەیمانگەکە دیاری نەکرێت، چونکە لە ساڵی 2009ـەوە تاوەکو ئێستا هەر کەسێک کرابێتە ڕاگر، لە دەرەوەی خەبات بووە.

بە گوتەی د. مەولود، یادداشتێکیان داوەتە د. ئیدریس هەرکی، سەرۆکی زانکۆی پۆلیتەکنیکی هەولێر و دەشڵێن: خەڵکی شیاو و خاوەن بڕوانامەی بەرز هەن کە دەتوانن بەرپرسیارەتییەکە لە ئەستۆ بگرن.

زانیاریی زیاتر: لەکاتێکدا سبەی سێشەممە قوتابییەکانی پەیمانگەکە تاقیکردنەوەیان هەیە، دەرگاکانی خوێندن "دادەخرێت و مامۆستایان و فەرمانبەران ناڕۆنە هۆڵەکانی خوێندنەوە".