کۆبوونەوەی لیژنەی تەکنیکی پارتی و یەکێتی دواخرا

ئاڤا نیوز

بڕیاربوو پێشنیوەڕۆی ئەمڕۆ چوارشەممە جارێکی دیکە لیژنەی تەکنیکی پارتی و یەکێتی لە هەولێر کۆببنەوە، بەڵام درەنگانی شەوی ڕابردوو دواخرا و لە ڕۆژانی داهاتوو ئەو کۆبوونەوەیە دەکرێت.

وێنە گەورەکە: هەنگاوەکانی پێکهێنانی حکومەت بەردەوامە و بۆ ئەم مەبەستەش لیژنەی تەکنیکی پارتی و یەکێتی چوار کۆبوونەوەیان لە هەولێر کردووە، بۆ نەخشەی پێکهێنانی حکومەتی نوێ و شێوازی حکومڕانی گفتوگۆی چڕی نێوانیان بووە، لە کۆبوونەوەی داهاتوو ئەو 15%ـی ڕەشنووسەی ماوە تەواو دەکرێت.

زانیاریی تایبەت: بەگوێرەی بەدواداچوونی ئاڤا، کۆبوونەوەی ئەمڕۆی لیژنەی تەکنیکی پارتی و یەکێتی لە هەولێر، کە پێنجەمین و دوایین کۆبوونەوەیانە، دواخراوە بۆ ڕۆژی پێنجشەممە 30-01-2025، بەڵام لەبارێکدا ئەگەر شاندی حکومەتی هەرێمی کوردستان بچێتە بەغدا کۆبوونەوەکە بۆ هەفتەی داهاتوو دوادەخرێت.

ئەمەش بزانە: لیژنەکە ڕەشنووسی دەسەڵاتەکانی سەرۆکی هەرێمی کوردستان، سەرۆکی حکومەت، جێگرەکانیان، دەسەڵاتی وەزیر و بریکاری وەزارەتەکان ئامادەدەکەن و دەیخەنە بەردەم شاندی باڵای هەردوولا بۆ بڕیاردان لەسەری.