90 کیلۆمەتری دیکە دیواری کۆنکریتی لەسەر سنووری عێراق - سووریا دادەنرێت

ئاڤا نیوز

لە سنووری شنگالەوە تاوەکو دەروازەی سنووریی ڕەبیعە 90 کیلۆمەتری دیکە دیواری کۆنکریتی لەسەر سنووری نێوان عێراق و سووریا دادەنرێت.

وێنە گەورەکە: عێراق و هەرێمی کوردستان 612 کیلۆمەتر سنووری هاوبەشیان لەگەڵ سووریا و ڕۆژئاوای کوردستان هەیە، لەگەڵ هێرشی دەستەی تەحریرولشام لە سووریا کە بە ڕووخانی ڕژێمی ئەسەد کۆتایی هات، عێراق ڕێوشوێنە ئەمنییەکانی بەدرێژایی سنوور لەگەڵ سووریا بەهێزتر كرد.

ڕاگەیێنراوی فەرمی: فەرماندەیی پاسەوانی سنووریی عێراق لە ڕاگەیێنراوێکدا تەوابوونی 90 کیلۆمەتر لە دیواری کۆنکریتی لەسەر سنووری سووریا، لە شنگالەوە تاوەکو ڕەبیعە ڕاگەیاند کە لەلایەن کارگەی کۆنکریتی فەرماندەییەکەیان و لەڕێگەی هەوڵ و بازووی کارمەندەکانیانەوە بووە و بەردەوام دەبن لە دروستکردن و دانانی دیواری کۆنکریتی.

ئەوەی لەوبارەیەوە دەگوترێت: پێشتر تەحسین خەفاجی، سەرۆکی شانەی ڕاگەیاندنی ئەمنی لە 7-1-2025، تەواوبوونی دروستکردنی 400 کیلۆمەتر لە دیواری کۆنکریتی نێوان هەردوو وڵاتی ڕاگەیاند و ئاماژەی بۆ ئەوەش کردبوو 210 بۆ 215 کیلۆمەترەکەی دیکە لە ناوەڕاستی ساڵدا تەواو دەبێت، بەمەش کۆتایی بە هەر بۆشایییەکی ئەمنی لە سنوورەکە دەهێنێت.