ئاڤا بەدواداچوون بۆ کێشەی زەویی کەمئەندامانی سەنگەر دەکات

ئاڤا نیوز

لە سنووری سەیدسادق ژمارەیەک پێشمەرگەی کەمئەندامی سەنگەر زیاتر لە 10 ساڵە فەرمانی وەرگرتنی زەوییان هەیە، بەڵام تا ئێستا پێیان نەدراوە.

چیرۆکی سەرەکی: 58 پێشمەرگەی کەمئەندامی سەنگەر لە سنووری سەیدسادق لە ساڵی 2014ـەوە فەرمانی وەرگرتنی زەوییان هەیە، سەرەڕای ئەوەش جارێکی دیکە فۆرمیان پێ پڕکراوەتەوە، کەچی بە بیانووی جۆراوجۆر زەوییان پێنەدراوە.

لێدوانی فەرمی: سەرۆکایەتیی شارەوانی سەیدسادق، بە ئاڤا میدیای ڕاگەیاند: "ئەم کەسانە پێشتر فەرمانی وەرگرتنی زەوییان بۆ دەرچووە، بەڵام خۆیان شوێنی زەوییەکانیان بەدڵ نەبووە و وتوویانە چاوەڕێی ئیفرازی زەوی دیکە ئەکەن، دوای تێپەڕینی چەند ساڵێک هاتوون و وتوویانە زەویمان دەوێت".

چارەسەرەکان: سەرۆکایەتیی شارەوانی سەیدسادق بە نووسراوی  ژمارە 548  لە 2023-02-28 فەرمانە کۆنەکەی بۆ دابەشکردنی زەوی بەسەر کەمئەندامانی سەنگەر بۆ بەڕێوەبەرایەتیی شارەوانەییەکانی سلێمانی ناردووە، لەوێوە ئاراستەی وەزارەتی شارەوانی کراوە، بۆ ئەوەی فەرمانەکە نوێ بکرێتەوە. دوای ئەوەی وەزارەتی شارەوانی و ئەنجوومەنی وەزیران ڕەزامەندیی دەدەن، فەرمانی دابەشکردنی زەوییەکانتان نوێ ئەکرێتەوە، ئینجا سەرۆکایەتیی شارەوانی سەید سادق دەتوانێ زەویییان پێ بدات.