دارایی عێراق پەیکەری بەڕێوەبردنی بانکی ڕەشید و ڕافیدەین ڕێکدەخاتەوە

ئاڤا نیوز

لە چوارچێوەی پلانەکانی بۆ نوێکردنەوەی سیستمی بەڕێوەبردنی بانکی، وەزارەتی دارایی عێراق ڕێکارەکانی بۆ دووبارە داڕشتنەوەی پەیکەری بەڕێوەبردنی بانکی ڕەشید و ڕافیدەین و کۆمپانیاکانی بیمە دەستپێکردووە و دەڵێت، ئەم هەنگاوە ئابووری نیشتیمانی بەهێزتر دەکات.

چیرۆکی سەرەکی: تەیف سامی، وەزیری دارایی سەرپەرشتی کۆبوونەوەیەکی فراوانی کردووە بە بەشداری سەرۆکی دیوانی بیمە، بەڕێوەبەرانی بانکە حکومییەکان، کۆمپانیاکانی بیمە، کۆمپانیای وردبینیی و وردبینی نێودەوڵەتی، ئەویش بە ئامانجی دووبارە ڕێکخستنەوەی پەیکەری بەڕێوەبردنی  کۆمپانیاکانی بیمە و بانکە حکومییەکان بەتایبەت بانکی ڕەشید و ڕافیدەین.

ڕاگەیێنراوی فەرمی: بەگوێرەی ڕاگەیێنراوێکی وەزارەتی دارایی عێراق،

- ئامانج لەو هەنگاوە بۆ هێنانەدیی جێگریی دارایی، بەهێزکردنی توانای بانکە حکومییەکان بەپێی پێوەرە نێودەوڵەتییەکان، گەشەپێدانی سیستەمی بانکی و بەهێزکردنی ڕۆڵی چاودێریی ناوخۆییە لە سیستمی بەڕێوەبردنی بانکیدا.

- پلانە ستراتیژییەکەیان بۆ کارکردنە بە تەکنیکە نوێیەکانی کاری بانکیی، لەوانەش پارەدانی ئەلیکترۆنیی، بەهێزکردنی شەفافیەت، باشترکردنی بەڕێوەبردنی سەرمایە بەگوێرەی پێوەرە نێودەوڵەتییەکان لەگەڵ دیاریکردنی وادەیەکی سنوردار بۆ پرۆسەی نوێکردنەوەی سیستەمی بانکی.