گۆرانیبێژێک لە زەماوەندێکدا هەواڵی مووچە بە میوانەکان ڕادەگەیێنێت

ئاڤا نیوز

هونەرمەندێک لە ئاهەنگێکدا هەواڵی هاتنی مووچە ڕادەگەیێنێت و بە میوانەکان دەڵێت "یەڵڵا شاییەکە گەرمتر بکەن".

وێنە گەورەکە: هاتن و نەهاتنی هەواڵی مووچە هەر بۆ میدیاکان نا، بەڵکو لە ماڵ، شوێنی کار، چایخانە و لە هەر شوێنێک بووە بە هەواڵ و خەڵکی باسی لێوە دەکەن، بەڵام ئەمجارە ئەوەشی تێپەڕاند و گەیشتە هۆڵی شایی و زەماوەندەکان، لەگەڵ ڕاگەیاندنی هەواڵی مووچە، هونەرمەندێک لە شاییێک هەواڵەکە ڕادەگەیێنێت.

ئەوەی پێویستە بیزانیت: لە زەماوەندێکی خێزانی، هونەرمەندی گۆرانیبێژ، هەڤاڵ کاوانی وەک شاباش بە میوانەکان دەڵێت، "هەواڵێکی خۆش گەیشت، تەیف سامی مووچەی نارد، ئەوە مووچەش هات و یەڵڵا شاییەکە گەرم بکەن". دوای ئەم هەواڵە زیاتر شاییەکە گەرم دەکات و خۆشی دەست بە هەڵپەڕین دەکات.

کاریگەریی و لێکەوتەکان: هاتن و نەهاتنی مووچە ساڵانێکە بۆ خەڵک و میدیاکان بووەتە هەواڵ، لەبەر ئەوەی ساڵانێکی درێژە حکومەتی عێراق هەر جارە و بە بیانوێک مووچەی مووچەخۆرانی هەرێمی کوردستان دوا دەخات، یان هەر ناینێرێت. مووچەخۆرانی هەرێمی کوردستانیش بە دەست ئەم بابەتەوە ماندووبوون و ڕەوشی دارایی و بژێوی ژیانیان تێکچووە.