هەڵکردنی ئاڵای کوردستان لەکەرکووک کاردانەوەی لێدەکەوێتەوە

ئاڤا نیوز

هەڵکردنی ئاڵای کوردستان لەپاڵ ئاڵای عێراق لەدیوانی پارێزگای کەرکووک لەکاتی سەردانەکەی قوباد تاڵەبانی، جێگری سەرۆکی حکومەتی هەرێمی کوردستان،  بۆ ئەو پارێزگایە کاردانەوەی لێدەکەوێتەوە.

وێنە گەورەکە: ئەمڕۆ 6-5-2025، قوباد تاڵەبانی سەردانی کەرکووکی کرد و لەگەڵ پارێزگار و سەرۆکی ئەنجوومەنی پارێزگاکە کۆبووەوە.

لێدوانی فەرمی: عەزام حەمدانی، گوتەبێژی ئەنجوومەنی سیاسی عەرەبی بەئاڤا میدیای گوت: لەو بڕگانەی ڕێککەوتنی لەسەر کراوە لەکاتی دامەزراندنی حکومەتی خۆجێی کەرکووک، پابەندبوونی سەرجەم لایەنەکانە بەعێراقێتی کەرکووکەوە، بەدەر لەمەش نابێت بەهیچ شێوەیەک ئاڵای کوردستان لەکەرکووک هەڵبکرێت،  یەکێتیش بەرامبەر پۆستی پارێزگاری ئەو شارە بەم مەرجانە ڕازیبووە.

لەلایەکی دیکەوە:  لەبەیاننامەیەکدا بەرەی تورکمانی عێراق دووپاتی دەکاتەوە، کە پارێزگاری کەرکووک لە هەردوو ڕوانگەی یاسایی و ئیدارییەوە پارێزگایەکی عێراقییە و سەر بە حکومەتی فیدراڵییە و هیچ لایەنێک مافی ئەوەی نییە جگە لە ئاڵای عێراق هیچ ئاڵایەکی دیکە هەڵبکات.

زانیاریی زیاتر: ئەنجوومەنی سیاسی عەرەبی و بەرەی تورکمانی عێراقی ئاماژە بەوەدەکەن، دانانی ئاڵای کوردستان لەنێو دیوانی پارێزگای کەرکووک، پێشێلکردنی بڕیارەکانی پەرلەمان و دەسەڵاتی دادوەری عێراقە.