ئەندامێکی لیژنەی دانوستاندنکار: پلان هەیە چەند فەرمانبەر خانەنشین بووە هێندە دەرچوو دابمەزرێت

ئاڤا نیوز

 

ئەندامێکی لیژنەی دانوستاندنکار لە لیژنەی هاوتاکردنی مووچەی خانەنشینی ڕایدەگەیێنێ، حکومەتی هەرێمی کوردستان پلانی هەیە بە ئەندازەی ئەو فەرمانبەرانەی خانەنشینکراون هێندە دەرچوو دابمەزرێنێت.

 

لێدوانی فەرمی: د.شێرزاد حەمید هروری، ئەندامی لیژنەی دانوستاندنکار لە لیژنەی خانەنشینی بە ئاڤا میدیای ڕاگەیاند: هەرێمی کوردستان پێویستی بە پسپۆڕی نوێ هەیە، بۆ نموونە لە پەیمانگەی نابیستانی دهۆک چەندین مامۆستا خانەنشین دەبن، هەموو کەس ناتوانێت لەو شوێنە وانە بڵێتەوە و پێویستی بە پسپۆڕی نوێ هەیە.

 

زانیاریی زیاتر:  د. شێرزاد حەمید هروری ئاماژە بۆ ئەوە دەکات، حکومەتی هەرێمی کوردستان پلانی هەیە بە ئەندازەی ئەو فەرمانبەرانەی خانەنشینکراون هێندە دەرچوو دابمەزرێنێت.

 

بەوتەی د.شێرزاد هروری، مووچەی خانەنشینی هەرێمی کوردستان وەکو خانەنشینی هەموو پارێزگاکانی عێراقی لێدێت. دوێنێ دوایین کۆبوونەوە کرا و هەموویان لەسەر ڕێککەوتنەکە واژۆیان کردووە.

 

بە تەنیشت ئەم بابەتەوە: یاسای خانەنشینی یەکگرتوو ژمارەی 9ـی ساڵی 2014، پلە باڵاکان و فەرمانبەرانی ئاسایی بەپێی هاوکێشەیەک خانەنشین دەکرێن، هاوکێشەکە بەمجۆرەیە: تێکڕای مووچەی بنەڕەتی بۆ سێ ساڵ دیاری دەکرێت، واتا لەو سێ ساڵە بە تێکڕا مووچەی بنەڕەتی چەند بووە، تێکڕای مووچەی هەر ساڵێک جارانی 12 دەکرێت، لەو سێ ساڵە سێ ژمارەی جیاوازمان دەستدەکەوێت و کۆیان دەکەینەوە دواتر دابەشی 36 دەکرێت، ئینجا ئەو ژمارەیەی دەستمان دەکەوێت جارانی ساڵانی خزمەتی دەکەین پاشان جارانی 2.5 دەکرێت، دواتر دابەشی 100 دەکرێت و مووچەیەک دەردەچێت. 

لەلایەکی دیکە: بۆ دەرماڵەی بارگرانی ژیان (غلاء المعيشي) بەمجۆرە کۆدەکرێتەوە، مووچەی خانەنشینی جارانی ساڵانی خزمەتی دەکرێت دواتریش دابەشی 100 دەکرێت، ئەو ژمارەیەی دەردەچێت جارانی دەرماڵەی بڕوانامە دەکرێت و مووچەی خانەنشینی دەردەچێت.