سبەی شاندێکی وەزارەتی دادی عێراق لە کەرکووک لەگەڵ جووتیارەکان کۆدەبێتەوە

 

ئاڤا نیوز

لەسەر ڕووداوەکانی ڕێگریکردنی سوپای عێراق لە جووتیارانی کەرکووک، سبەی سێشەممە شاندێکی وەزارەتی دادی عێراق و وەزارەتە پەیوەندیدارەکانی دیکە لە بینایەی پارێزگای کەرکووک لەگەڵ جووتیارانی ناوچەکە کۆدەبنەوە.

وێنە گەورەکە: نیو سەدەیە پشتئەسستوور بە بڕیاری مەجلس قیادە سەورەی ڕژێمی بەعس کە ئێستا لە پەرلەمان هەڵوەشاوەتەوە، لە وەرزی داچاندن و دروێنەدا سوپای عێراق و عەرەبی هاوردە ناهێڵن جووتیارانی کورد زەوییە ڕەسەنەکانیان بەکاربهێنن.

زانیاریی بەدەستهاتوو: لیژنەیەک بەسەرۆکایەتی بریکاری وەزیری داد و نوێنەرانی وەزارەتە پەیوەندیدارەکان پێشنیوەڕۆی سبەی سێشەممە لە بینایەی پارێزگای کەرکووک لەگەڵ جووتیارانی ناوچەکە کۆدەبنەوە.

لەلایەکی دیکەوە: لەسەر ڕاسپاردەی سەرۆک بارزانی، سبەی شاندێکی فراکسیۆنی پارتی لە پەرلەمانی عێراق سەردانی کەرکووک دەکەن و لە ڕووداوەکانی گوندی شەناغە دەکۆڵێتەوە و لەگەڵ فەرماندەی ئۆپەراسیۆنەکانی کەرکووک کۆدەبێتەوە.