دادگای باڵای فیدراڵی عێراق وەڵامی چوار سکاڵای سەرۆککۆماری عێراق دەداتەوە

ئاڤا نیوز

 

دادگای باڵای فیدراڵی وەڵامی چوار سکاڵاکەی د. لەتیف ڕەشید سەرۆککۆماری عێراقی دایەوە، سێ لە سکاڵاکانی ڕەتکردووەتەوە و تێبینی لەسەر سکاڵایەکیش داوە.

 

زانیاریی پەیامنێر: دەروون مەلاناجی پەیامنێری ئاڤا لە بەغدا ڕایگەیاند: دادگەی باڵای فیدراڵی بڕیاریدا پرۆسەی تەوتین کردنی مووچەی فەرمانبەرانی هەرێمی کوردستان جێبەجێبکرێت، هەر بەگوێرەی ڕێنماییەکانی بانکی ناوەندیی عێراق، سێ سکاڵای دیکەی سەرۆککۆماری ڕەتکراوەتەوە. 

 

زانیاریی زیاتر: ڕەتکردنەوەی ئەو سێ سکاڵایە بەهۆی ئەوەیە کە لەچوارچێوەی کارەکانی دادگای فیدراڵی نییە کە پێکهاتوون لەمانە:

 

- دەرکردنی فەرمان سالارێک بۆ پابەندکردنی وەزارەتی دارایی بەخەرجکردنی مووچەی فەرمانبەرانی هەرێمی کوردستان.

- پابەندکردنی وەزارەتی دارایی عێراق بەخەرجکردنی مووچەی فەرمانبەرانی هەرێـمی کوردستان بە بەردەوامی و بێ دواخستن بە پاساوی کاروباری هونەری و کارگێڕی.

-سکاڵا چوارەم پەیوەست بوو بە پابەندکردنی پەرلەمانی عێراق بە هەموارکردنەوەی بڕگەی (ج)ی مادەی 12ی یاسای بودجەی گشتیی، کە پێشتر پەرلەمانی عێراق ئەو بڕگەیەی هەموارکردووەتەوە.