ئیدارەی ڕۆژئاوای کوردستان: گفتوگۆکان لەگەڵ دیمەشق بەردەوامن

ئاڤا نیوز

کۆبوونەوەی سێ قۆڵی ئیدارەی سیاسیی، سەربازیی و کارگێڕیی ڕۆژئاوای کوردستان بەڕێوەچوو و تێیدا جەخت لە بەردەوامی گفتوگۆکان لەگەڵ دیمەشق و ڕاگرتنی گرژییەکانی بەنداویی تشرین کرایەوە.

بۆچی گرنگە: کورد لە سووریا داوای پاراستنی مافەکانی لە دەستووری نوێی وڵاتەکە دەکات، هەسەدەش دەیەوێت وەک هێزێک بچێتە ناو سوپای سووریاوە، بەڵام بەو مەرجەی وەک یەک کوتلەبێت نەک ئەندامەکانی تاک تاک بچنەناو سوپاوە.

ڕاگەیێنراوی فەرمی: ئیدارەی خۆبەڕێوەبەری هەرێمی باکوور و ڕۆژهەڵاتی سووریا بڵاویکردەوە، ئەمڕۆ سێشەممە هاوسەرۆکایەتی ئیدارەی خۆبەڕێوەبەری باکوور و ڕۆژهەڵاتی سووریا، فەرماندەیی هێزەکانی سووریای دیموکرات (هەسەدە) و ئەنجوومەنی سووریای دیموکرات (مەسەدە) کۆبوونەوە، لە کۆبووونەوەکەشدا کە مەزڵووم عەبدی، فەرماندەی گشتی هەسەدە ئامادەی بوو، هەڵسەنگاندن بۆ دۆخی سووریا و گفتوگۆکان لەگەڵ ئیدارەی نوێی وڵاتەکە کراوە.

دەرئەنجامی کۆبوونەوەکە: 

- کۆبوونەوە لەگەڵ هەموو پێکهاتەکانی هەرێمی باکوور و ڕۆژهەڵاتی سووریا بکرێت، بە ئامانجی بەشدارییەکی کارا و گشتگیریی هەموو پێکهاتەکان لە پرۆسەی سیاسییدا.

- جەخت لە گرنگی و بەردەوامی گفتوگۆکان لەگەڵ دیمەشق کرایەوە، هەروەها پێویستە چارەسەرێک بۆ دۆسییە پێشنیازکراوەکان بەگوێرەی ڕێکاری گونجاو بدۆزرێتەوە، لەوانەش تێکەڵکردنی دامەزراوە سەربازیی و کارگێڕییەکان و گەڕانەوەی ئاوارەکان بۆ ناوچەکانی خۆیان.

- کۆبوونەوەکە داوایکرد هەموو گرژییەکان ڕابگیرێن، وەک گەرەنتییەک بۆ پێشکەوتنی گفتوگۆکان، لەمبارەیەشەوە داوا دەکەین دیمەشق بەرپرسیارێتیی خۆی جێبەجێ بکات.