چارەسەركردنی گرفتی كەمئاویی هەولێر قۆناغێكی گرنگ دەچێتە پێشەوە

ئاڤا نیوز

بەردی بناغەی پرۆژەی تێكەڵكردنی هێڵە سەرەكییەكانی پرۆژەی خێرای گەیاندنی ئاوی هەولێر بە هێڵە لاوەكییەكانی گەڕەكەكان دادەنرێت و تاوەكو هاوینی ئەمساڵ نیوەی گەڕەكەكانی شاری هەولێر لە بێئاوی ڕزگاریان دەبێت.

زانیاریی بەدەستهاتوو: سبەی پێنجشەممە، 20-2-2025 بەردی بناغەی پڕۆژەی دانان و دابەشكردنی تۆڕی ئاوی ناوخۆ لە هێڵە لاوەكییەكان بە هێڵە سەرەكییەكانی پڕۆژەی خێرای گەیاندنی ئاوی هەولێر دادەنرێت و ماوەی یەك ساڵ دەخایێنێت و تێچووی پڕۆژەكەش 25 ملیار دینارە و لەلایەن كۆمپانیای كەی وەن جێبەجێ دەكرێت و بەڕێوەبەرایەتیی ئاوی هەولێریش سەرپەرشتیی دەكات.

قووڵتر: مەبەست لە پڕۆژەكە تێكەڵكردنی بۆریی سەرەكیی پڕۆژەی خێرای گەیاندنی ئاوی هەولێرە بە بۆرییە لاوەكییەكانی گەڕەكەكانی شاری هەولێر بۆ ئەوەی لە هیچ گەڕەك و شوێنێكی شاری هەولێر گرفتی كەمئاوی نەمێنێت، بەپێی گوتەی سەرپەرشتیارانی پرۆژەكە تاوەكو ناوەڕاستی ئەمساڵ ئاوی پرۆژەكە بە نیوەی گەڕەكەكانی شاری هەولێر دەگات و گرفتی كەمئاوییان نامێنێت و تاوەكو كۆتایی ئەمساڵیش پرۆژەكە كۆتایی دێت.

ئەوەی پێویستە بیزانیت: پڕۆژەی فریاگوزاری خێرای ئاوی هەولێر یەکێکە لە پڕۆژە ستراتیژییەکانی کابینەی نۆیەم، ئامانج لێی ئەوەیە تا 30 ساڵی تر شاری هەولێر کێشەی ئاوی خواردنەوەی نەمێنێت و بڕیارە بە تەواو بوونی هەزار بیری ئاوی خواردنەوە بە یەکجاری دابخرێن.