حەشدی شەعبی هاوشێوەی دەزگا ئەمنییەکانی دیکەی عێراق ڕێکدەخرێتەوە

ئاڤا نیوز

دەستەی حەشدی شەعبی، هاوشێوەی دەزگا ئەمنی و سەربازییەکانی دیکەی عێراق ڕێکدەخرێتەوە، بۆ ئەو مەبەستەش ئەنجوومەنی وەزیران دەنگ لەسەر یاسایەکی نوێ بۆ حەشدی شەعبی دەدات.

وێنە گەورەکە: دوای ئەوەی هێرشی چەکدارانی داعش بۆ سەر عێراق دەستیپێکرد، بە فتوای ئاینیی لە نەجەف ئەو گرووپە چەکدارییە دروستکرا، دواتر یاسای دەستەی حەشدی شەعبی بە زۆرینەی دەنگ لە 2016 پەسندکرا و هێزەکەی کرد بە هێزێکی یاسایی لە چوارچێوەی هێزە سەربازییەکانی عێراق.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە کۆبوونەوەی ئەمڕۆی ئەنجوومەنی وەزیران بە سەرۆکایەتی محەممەد شیاع سوودانی، پڕۆژە یاسای نوێی دەستەی حەشدی شەعبى پەسەندکرا، بۆ دەنگدان لەسەر پرۆژە یاساکەڕەوانەی ئەنجوومەنی نوێنەرانى عێراق دەکرێت.

زانیاریی بەدەستهاتوو: بەگوێرەی سەرچاوەیەکی بەرپرس لەنێو کۆبوونەوەکە: پەسەندکردنی یاسای نوێی حەشدی شەعبی لە چوارچێوەی هەنگاوەکانی چاکسازی لە دامەزراوە ئەمنیەکان دێت، بە ئامانجی ڕێکخستنی دەستەی حەشدی شەعبی، هاوشێوەی دەزگا ئەمنی و سەربازییەکانی دیکەی دەوڵەت.

ئەوەی پێویستە بیزانیت: ئەم هەنگاوانەی حکومەتی عێراق لە کاتێکدایە، بەرپرسانی عێراقی ئەوەیان نەشاردووەتەوە کە هەڕەشە لەسەر عێراق هەیە و ئەمریکا چەند جارێک داوای هەڵوەشاندنەوەی حەشدی شەعبی و تێکەڵکردنیان بە هێزە ئەمنییەکان کردووە.