رۆفاتێن 42 کوردێن ئێزدی بۆ شنگالێ دێ هێنە ڤەگەڕاندن

ئاڤا دیجیتاڵ  

 

پشتی ئاشکرا کرنا ناسنامەیێن وان، بڕیارە رۆفاتێن 42 کوردێن ئێزدی کو ژلایێ داعشێ ڤە هاتبوونە کۆمکوژ کرن بۆ شنگالێ بهێنە ڤەگەڕاندن، دووبارە ل زێدێ وان بهێنە ڤەشارتن.

 

چیرۆکا سەرەکی: ل نۆژداریا دادا بەغدا پشکنین بۆ 42 رۆفاتێن کوردێن ئێزدی تەمام بووینە و ناسنامەیێن وان هاتینە ئاشکرا کرن، بڕیارە رۆژا 21-1-2024ـێ، ل گۆرەپانا هەلکەفتان ل بەغدا مەراسیمێن تایبەت ژبۆ بهێنە گێڕان، ل رۆژا دویڤدا (22-1-2024) رۆفات بۆ قەزا شنگالێ دێ هێنە ڤەگەڕاندن.

 

داخویانیا فەرمی: ئامادەکاریێن تەمام بۆ ڤەگەڕاندنا وان رۆفاتان هاتینە کرن و ل گوندێ حەردان یێ باکوورێ چیایێ شنگالێ 42 گۆڕ هاتینە کولان، پشتی ڤەگەڕاندنێ دێ دووبارە و ب مەراسیمێن تایبەت ئەو رۆفاتە هێنە ڤەشارتن. خەیری عەلی ئیبراهیم، رێڤەبەرێ سازییا مافێن مرۆڤان ل شنگالێ ئەڤە بۆ ئاڤا میدیا گوت.

 

زانیاریێن زێدەتر: ئەو وەلاتیێن کوردێن ئێزدی ل سالا 2014ـێ ژ لایێ چەکدارێن داعش ڤە هاتبوونە کۆمکوژ کرن و ئاکنجیێن گوند و کۆمەلگەهێن جودایێن شنگالێ بوون، ژ وان ژی حەردان، قەنێ، کۆچۆ و خانەسۆرێ، هژمارا وان 42 کەسن و هەمی ژی ژ ڕەگەزێ نێرن و تەمەنێ وان د ناڤبەرا 12 - 70 سالان دانە.

 

نێرینا لایەنێ بەرامبەر: حالە سەفیل، رزگابوویەکا دەستێ داعشێیە، وەک وێ بۆ ئاڤا میدیا ڤەگێڕای، ل سالا 2014ـێ داعشێ زێدەتری 300 کەسان ژ گوندێ حەردان گرتبوون، زێدەتر ژ 100 کەسان ژی د گۆڕێن بکۆم دا کوشتبوون و دبێژیت، "د ناڤ وان دا باب و برایەکێ من ژی هەبوون، هەتا نوکە ژی چارەنڤیسێ 170 کەسێن گوندێ مە نەدیارن".

 

باکگراوند: ل سالا 2014ێ چەکدارێن داعشێ هێرشی سەر قەزا شنگالێ کر و هزاران وەلاتیێن ئێزدی کۆمکوژ کرن و رەڤاندن، ل دویڤ ئامارێن نڤیسینگەها رزگارکرنا ئێزدیێن رەڤاندی، ژبەر هێرشێ زێدەتری 425 هزار کەس ئاوارەبوون، هەر ل دویڤ ئاماران هەتا ڤێگاڤێ نێزیکی 100 گۆڕێن بکۆم ل سنوورێ شنگالێ هاتینە دیتن.