دوای هێرشە فراوانەکەی ڕووسیا، زێلێنسکی داوای ئاگربەستی بەپەلە دەکات

ئاڤا نیوز

ڕووسیا هێرشێکی ئاسمانی فراوانی کردە سەر وێستگەکانی وزەی ئۆکراینا و سەرۆکی ئۆکراینا داوای ئاگربەستی بەپەلە دەکات.

چیرۆکی سەرەکی: ئەمڕۆ هەینی 2025-03-07، سوپای ڕووسیا هێرشێکی ئاسمانی فراوانی لە ڕێگەی 67 موشەک و 194 فڕۆکەی بێ فڕۆکەوان بۆ سەر ژمارەیەک وێستگەی وزە و سوتەمەنی ئۆکراینا ئەنجامدا، سەرۆکی ئۆکراینا داوای ئاگربەست و ڕاگرتنی هێرشە ئاسمانیەکان لە ڕووسیا دەکات.

لێدوانی فەرمی: ڤۆلۆدیمێر زێلێنسکی ڕایگەیاندووە، لە پێناو بەدیهێنانی ئاشتی ڕاستەقینە دەبێت سەرچاوەی سەرەکی ئەم جەنگە کە ڕووسیایە ڕابگیرێت و ناچار بکرێت بە ئاگربەست و ڕاگرتنی ‌هێرشە ئاسمانیەکان دژ بە خاک و هاوڵاتیانی ئۆکراینا.

زانیاریی زیاتر: هێزی ئاسمانی ئۆکراینا لە بڵاوکراوەیەکی فەرمیدا خستنەخوارەوەی 34 موشەک و 100 درۆنی لە کۆی 67 موشەک و 194 درۆنی ڕووسی کە لە هێرشەکەدا بەکارهێنراون ڕاگەیاندووە.

لە لایەکی دیکەوە: دۆناڵد ترەمپ، سەرۆکی ئەمریکا لە پلاتفرۆمی سۆشیال تروس ڕایگەیاندووە، لەسەر بنەمای هێرشە بەردەوامەکانی ڕووسیا بۆسەر خاکی ئۆکراینا و لە پێناو ڕاگەیاندنی ئاگربەست، خوێندنەوە بۆ گەڕێکی نوێی سزاکان بۆ سەر بانکەکانی ڕووسیا و زیادکردنی باج لەسەر بەرهەمەکانی ئەو وڵاتە دەکات.