تورکیا پرۆژەیەکی پەروەردەیی لە سلێمانی دەکاتەوە

ئاڤا نیوز

 

تورکیا پرۆژەیەکی پەروەردەیی لە شاری سلێمانی ڕادەگەیێنێت و بەنیازە قوتابخانەیەکی نێودەوڵەتی دروست بکات، ئەمەش دەبێتە یەکەم پرۆژەی تورکیا لەو شارە.

 

بۆچی گرنگە: کردنەوەی پرۆژەیەکی پەروەردەیی لەمشێویە لەکاتێکدایە، بەتۆمەتی هاوکاریکردنی پارتی کرێکارانی کوردستان 'پەکەکە'، پەیوەندی نێوان تورکیا و یەکێتی نیشتمانیی کوردستان خراپە و نزیکەی دوو ساڵیشە تورکیا گەشتە ئاسمانییەکانی بەڕووی فڕۆکەخانەی سلێمانی داخستوون.

لێدوانی فەرمی: ئێرمان تۆپچو، کونسوڵی گشتیی تورکیا لە هەولێر ڕایگەیاند، پلان و پرۆژەی پەروەردەیی زۆر باشیان هەیە بۆ ئەوەی لەڕێگەیەوە پەرە بە پەیوەندییەکانیان لەگەڵ کوردستان بدەن.

زانیاریی زیاتر: کونسوڵی گشتیی تورکیا لە هەولێر لەبارەی پرۆژەکانیانەوە دەڵێت، سەرقاڵی ئەوەن پرۆژەکانیان فراوان بکەن و ئامانجیانە لە دهۆکیش قوتابخانەی نوێ دروست بکەن. لە سلێمانیش زەوی پێویستیان بۆ دیاری کراوە، ئەگەر هەلومەرج و بارودۆخەکان یارمەتیدەر و لەباربن، بەمنزیکانە دەست دەکەن بە بونیادنانی قوتابخانەکە. 

بە تەنیشت ئەم بابەتەوە: بەرپرسانی باڵای تورکیا بەتایبەت ڕەجەب تەیب ئەردۆغان، سەرۆککۆمار و هاکان فیدان، وەزیری دەرەوەی تورکیا چەندینجار هۆشدارییان داوەتە بەرپرسانی یەکێتی لە پەکەکە دووربکەونەوە.