607 کەس لە کەمپی هۆلەوە بۆ عێراق دەگەڕێنرێنەوە

ئاڤا نیوز

 

لەچوارچێوەی گەڕاندنەوەی ژن و منداڵی چەکدارانی داعش کە بە ڕەچەڵەک عێراقین، ئەمڕۆش 607 کەس لە کەمپی هۆلی ڕۆژئاوای کوردستانەوە بۆ عێراق گەڕێنرانەوە.

 

ئەوەی پێویستە بیزانیت: وەزارەتی کۆچ و کۆچبەرانی عێراق ئاشکرای کردووە کە تا ناوەڕاستی مانگی ڕابردوو 3200 خێزانی چەکدارانی داعش لە کەمپی هۆلی ڕۆژئاوای کوردستانەوە بۆ وڵات گەڕاندووەتەوە کە پێکهاتوون لە 12 هەزار و 500 کەس، نزیکەی 15 هەزار عێراقیش لە کەمپەکەدا ماون.

 

زانیاریی بەدەستهاتوو: ئیدارەی کەمپی هۆل بە میدیای عێراقیی ڕاگەیاند, 161 خێزانی عێراقی کە لە 607 کەس پێکهاتوون، کەمپی هۆلیان بەرەو عێراق بەجێهێشتووە.

 

زانیاریی زیاتر: "ئەو خێزانانە لەڕێگەی پاسەوە گوازراونەتەوە کە حکومەتی عێراق ناردوونی، هێزێکی چاودێریی و پاراستنی ئەمریکاش بەرەو سنووری عێراق لەگەڵیانە، دواتریش لە کەمپی جەدعە لە نەینەوا جێگیر دەکرێن". ئیدارەی کەمپەکە وادەڵێت.

 

لەلایەکی دیکە: "هەماهەنگی لەنێوان ئیدارەی خۆسەر و حکومەتی عێراق بەردەوامە تا هەر خێزانێکی عێراقی ئارەزوو بکات، بۆ وڵاتەکەی بگەڕێنرێنەوە".