پڕۆژەی فریاگوزاریی خێرای ئاوی هەولێر 75%ی تەواو بووە

ئاڤا نیوز
 
پڕۆژە گرنگ و ستراتیژییەکەی سەرۆکوەزیران مەسرور بارزانی، هاوینی ئەمساڵ هاووڵاتیانی هەولێر لە کەمئاوی ڕزگار دەکات و لە کۆیی 127 گەڕەک نیوەی گەڕەکەکان سوودمەند دەبن لە پڕۆژەکە. 

وێنە گەورەکە: ساڵانی ڕابردوو لەگەڵ دەستپێکی وەرزی هاوین، بەشێک لە گەڕەکەکانی هەولێر تووشی گرفتی کەمئاوی دەبوونەوە بەهۆی زۆری خواست لەسەر بەکارهێنانی ئاو، بەڵام هاوینی ئەمساڵ ئەو گرفتەیان بۆ چارەسەر دەکرێت لە ڕێگەی پڕۆژەیەکی سەرۆکوەزیران مەسرور بارزانییەوە.  

لێدوانی فەرمی: ئەندازیار ئەنەس، بەڕێوەبەری پڕۆژەی فریاگوزاریی خێرای ئاوی هەولێر بە ئاڤای ڕاگەیاند، پڕۆژەکە ڕێژەی 75%ـی تەواوبووە و بەپێی پلانی داڕێژراو پڕۆژەکە لە کاتی دیاریکراوی خۆیدا واتە لەمانگی تەمموزی ئەمساڵ تەواو دەبێت و ئێستا کارکردن لە پڕۆژەکە بەشێوەی 24 کاتژمێری بەردەوامە.

زانیاریی زیاتر: ئێستا 75٪ی پڕۆژەکە تەواو بووە و هاوینی ئەمساڵ زیاتر لە 64 گەڕەکی هەولێر لە کۆی 127 گەڕەک سوودمەند دەبن لە پڕۆژەکە و 24 کاتژمێر کاری تێدا دەکرێت بۆ ئەوەی لە نزیکترین کاتدا پڕۆژەکە بە یەکجاری تەواو بکرێت، بە تەواوکردنیشی زیاتر لە 248 هەزار ماڵ سوومەند دەبن. 

ئەوەی پێویستە بیزانیت: بە تەواوبوونی پڕۆژەکە کاریگەریی بەرچاوی دەبێت لە دوورخستنەوەی مەترسی بەبیابانبوونی و وشکەساڵی لەسەر هەولێر، تێچووی پڕۆژەکە  480 ملیۆن دینارە و لەلایەن هێمن گرووپەوە جێبەجێ دەکرێت.