یەپەشە هەڕەشە لە سوپای عێراق دەکات

 

ئاڤا نیوز

یەپەشە بە تووندی ناونانی هێزەکانیان بە "بەکرێگیراو و تیرۆریست" ڕەتدەکاتەوەو هەڕەشەی ئازادکردنی شەڕڤانەکانیشیان لە سوپای عێراق دەکات و ئاماژە بۆ ئەوە دەکات "هەرچی پێویست بێت بۆ ئازادکردنیان دەیکەین". سەلامەتی گیانی ئەندامە دیل و بریندارەکانیشی دەخاتە ئەستۆی سوپای عێراق.

وێنە گەورەکە: شەوی سێشەممەی ڕابردوو، شنگال دۆخێکی نائارامی بەخۆیەوە بینی و شەڕ و پێکدادان لە نێوان گرووپێکی چەکداریی هێزەکانی پاراستنی شنگال (یه‌په‌شه‌) و سوپای عێراق  ڕوویدا و بە هۆیەوە شەش کەس بریندار بوون.

پێدراوە ڕاستییەکان: ڕۆژێک دوای ڕووداوەکە، شانەی ئەمنیی عێراق ڕایگەیاند، گرووپێکی لە یاسا دەرچوو لە قەزای شنگال هاوڵاتییەکیان ڕفاند،  دواتر هێزەکانیان لە سوپای عێراق توانیویانە ڕفێنراوەکە ئازاد بکەن و ئەوانەش دەستگیر بکەن کە دەستیان لە ڕفاندنی هاووڵاتییەکە هەبووە.

ڕاگەیێنراوی فەرمی: بەگوێرەی ڕاگەیێنراوێکی یەکینەکانی پاراستنی شنگال "یەپەشە":

٠ سوپای عێراق هێرشێکی ستەمکارانەیان کردە سەر هێزەکانمان و لە ئەنجامدا پێنج هەڤاڵمان دەستگیرکران.

٠ هەندێک لێدوانی فەرماندەیی سوپا کە هەڤاڵانی دیلمان بە تیرۆریست و بەکرێگیراو وەسف دەکەن، جێگەی قبووڵکردن نییە و بەتووندی ڕەتی دەکەینەوە.

٠ شەڕڤانەکانمان لەکاتی جێبەجێکردنی ئەرکەکانیان، لەکاتی گەڕانەوەیان بۆ سەنتەری شاری شنگال، کەوتوونەتە بۆسەیەکی پلان بۆداڕێژراو.

٠ ئەم ڕووداوە بە پیلانگێڕی و پلانێکی پێشوەختە لەلایەن بەشێک لە ئەفسەرانی سوپا بە هەماهەنگی لەگەڵ دەزگایەکی ئەمنی کراوە.

٠ ئەو تۆمەتانەی کە لەلایەن ئەو لایەنانەوە دەرکراون سەبارەت بەم ڕووداوە بێ بنەمان و ڕفاندنی ڕۆڵەی گەلەکەمان ناعەقڵانییە.

٠ داوای ئازادکردنی "دەستبەجێ"ـی ئەو پێنج شەڕڤانەمان دەکەین و هەرچی پێویست بێت بۆ ئازادکردنیان، دەیکەین.

٠ داوا لە لایەنە بەرپرسەکانی عێراق دەکەین لەم کاتەدا ژیرانە و بەرپرسیارانە مامەڵە بکەن.

٠ بۆ ئەوەی هیچ هەڵکشانێک ڕوونەدات، دەبێت هەڤاڵانمان بەبێ دواکەوتن ئازاد بکرێن، بۆ ئەوەی دووربن لە هەر کاردانەوەیەکی جددی کە ڕەنگە لە ئەنجامی ڕووداوەکەوە بێتە ئاراوە.

ئەوەی پێویستە بیزانیت: پێشتریش یەکینەکانی پاراستنی شنگال (یەپەشە)، لەسەر دەستگیرکردنی پێنج شەرڤانیان لەلایەن پۆلیسی عێراق، هەڕەشەی هەڵگیرسانی شەڕیان کردبوو، هاوکات مۆڵەتی 24 کاتژمێریان بە سوپا و پۆلیسی عێراق دابوو بۆ ئەوەی چەکدارەکانیان ئازاد بکرێن.