سوپای عێراق لەناو شاری شنگال دەکشێتەوە

ئاڤا نیوز

 

بەرپرسێکی سوپای عێراق ئاشکرایکرد، بەگوێرەی ڕێککەوتنێک لەگەڵ یەکینەکانی پاراستنی شنگال (یەپەشە)، هێزەکانی سوپای عێراق لە نێو شاری شنگال دەکشێنەوە.

 

چیرۆکی سەرەکی: درەنگانی شەوی سێشەممەی ڕابردوو شەڕ و پێکدادان لەنێوان گرووپێکی چەکداریی (یه‌په‌شه‌) و سوپای عێراق لە شنگال ڕوویدا، لە ئەنجامدا شەش کەس لەهەردوو بەرە  بریندار بوون، ئەمەش دوای ئەوە هات کە چەکدارانی یەپەشە چوونەتە سەر ماڵی ئەندازیارێکی ئێزدی و ڕفاندوویانە، کەسوکارەکەشی هانایان بۆ سوپای عێراق بردووە.

 

ئەوەی پێویستە بیزانیت: ئەسیر هەمزە، فەرماندەی فیرقەی 20ـی سوپای عێراق بە ئاڤا میدیای ڕاگەیاند: دوای چەند ڕۆژێک گرژی لەنێوان هێزەکانی به‌رخۆدانی شنگال (یه‌په‌شه‌) و سوپای عێراق، ئەمڕۆ شەممە 22-3-2025  هەردوولا گەیشتنە ڕێککەوتن .

زانیاریی زیاتر: "بەپێی ڕێککەوتنەکە هێزەکانی سوپا لە ناوەندی شاری شنگال دەکشێنەوە، لەبەرامبەردا لایەنگرانی (یه‌په‌شه‌) کۆتایی بە ناڕەزایی و گردبوونەوەکانیان دەهێنن. هاووڵاتییان دڵنیادەکەینەوە کە لە ئەمڕۆوە هیچ هەڵکشانێکی ئەمنی لە شارەکەدا ڕوونادات".