وەزارەتی دارایی ڕەتیدەکاتەوە پارەی هەڵمەتی کوتانی سورێژەیان بۆ هاتبێ

ئاڤا نیوز

وەزارەتی دارایی و ئابووری هەرێمی کوردستان لە ڕاگەیێنراوێکدا قسەی ئەندام پەرلەمانێکی نەوەی نوێ ڕەتدەکاتەوە، گوایە پارەی هەڵمەتی کوتانی سورێژە بۆ هەرێمی کوردستان نێردراوە.

چیرۆکی سەرەکی: پەرلەمانتارێکی نەوی نوێ لەم ڕۆژانە بڵاویکردووەتەوە، وەزارەتی دارایی فیدراڵ بڕی زیاتر لە یەک ملیار دیناری بۆ وەزارەتی دارایی هەرێمی کوردستان ناردووە کەچی خەرجی ناکەن.

ڕاگەیێنراوی فەرمی: وەزارەتی دارایی و ئابووری هەرێمی کوردستان دەڵێت: بە نووسراوی ژمارە (190677) کە لە 8-10-2024 دەرچووە تیایدا هاتووە، بڕیاردرا بە گواستنەوەی نۆ ملیار و 90 ملیۆن و 765 هەزار دینار لە فەرمانگەی بوودجە بۆ فەرمانگەی ژمێرکاری بۆ هەڵمەتی کوتان لە سەرتاسەری عێراق.

- پشکی هەرێمی کوردستان لەو بڕە  بریتی بووە لە یەک ملیار و 78 ملیۆن و 294 هەزار دینار، ئەمەش بۆ پاداشتی تیمەکان و کرێی هاتووچۆ و خەرجی هاتوچۆ.

- لە ڕاگەیێنراوەکەی وەزارەتی دارایی ئەوەش هاتووە: دەبێ جیاوازی بکرێت لەنێوان تەرخانکردن و تەمویل کردن، هێشتا یەک دیناری ئەو پارەیەمان بۆ نەهاتووە. کاتێک تیمەکانمان لە بەغدا سەروسۆراغی ئەو پارەیان کردووە، فەرمانگەی ژمێریاری وەزارەتی دارایی عێراق وتویانە ئەو پارەیە لەسەر بودجەی ساڵی 2025 دەبێت.