بۆ یەکەمجار بەریتانیا و ئەمریکا بە هاوبەشی مووشەکی هایپەرسۆنیک تاقی دەکەنەوە

ئاڤا نیوز

وەزارەتی بەرگریی بەریتانیا تۆمارکردنی قۆناغێکی نوێ و گرنگی لە بەرهەمهێنانی مووشەکی هایپەرسۆنیک بە هاوبەشی لەگەڵ ئەمریکا ڕاگەیاند.

وێنە گەورەکە: پێشبڕکێی دروستکردنی پیشەسازی چەک لە نێوان وڵاتان و بە تایبەت لە نێوان ناتۆ و ڕووسیا بەردەوامی هەیە و دوای ڕێککەوتنی ئەمریکا و بەریتانیا بۆ دروستکردنی جۆرێکی نوێ لە مووشەکی خێراتر لە دەنگ، ئەمڕۆ یەکشەممە وەزیری بەرگری بەریتانیا تۆمارکردنی قۆناغێکی گرنگی لە دروستکردنی بزوێنەری مووشەکی هایپەرسۆنیک ڕاگەیاند و یەکەم تاقیکردنەوەی مووشەکەکە ئەنجام درا.

لێدوانی فەرمی: جۆن هییڵی، وەزیری بەرگریی بەریتانیا ڕایگەیاند: " زاناکانمان قۆناغیکی گرنگیان لە دروستکردنی بزوێنەری مووشەکی هایپەرسۆنیک بڕی و بە سەرکەوتووانە تاقی کرایەوە، ئەمڕۆ سات و قۆناغێکی گرنگ بوو لە مێژووی تویژینەوەکان لەسەر دروستکردنی موشەکی هایپەرسۆنیک و پیشەسازی چەک، ئەم قۆناغە گرنگەی ئەمڕۆ ئامانجێکی هاوبەش و گرنگی بەریتانیا و ئەمریکا بوو."

ئەوەی پێویستە بیزانیت: مووشەکی هایپەرسۆنیک خێراییەکەی دەگاتە پێنج ئەوەندی خێرایی دەنگ، زیاد لە 3 هەزار و 800 میل دەبڕێت لە کاتژمێرێکدا و هیچ فڕۆکەیەک توانای ڕێگریکردن و خستنەخوارەوەی نییە.

بۆچی گرنگە: پێشکەوتنی بەریتانیا و ئەمریکا لە دروستکردنی مووشەکی هایپەرسۆنیک گرنگییەکی گەورەی بۆ هەردوو ووڵات و ناتۆ هەیە، چونکە ڕووسیا بۆ ماوەی چەندین ساڵە کار لە سەر سیستمی مووشەکی دەنگبڕ دەکات و پێشکەوتنی گەورەی بەدەستهێناوە.