مالیکی داوای چاکسازی لە مووچەی فەرمانبەران دەکات

ئاڤا نیوز

سەرۆکی هاوپەیمانی دەوڵەتی یاسا داوای دەستکاریکردنی مووچەی فەرمانبەرانی حکومەت دەکات، هاوکات پاڵپشتی خۆیشی بۆ خۆپیشاندانی ئاشتییانەی فەرمانبەران دەردەبڕێت.

وێنە گەورەکە: ماوەی چەند ڕۆژێکە مامۆستایانی عێراق بایکۆتی هۆڵەکانی خوێندنیان کردووە و داوای زیادکردنی مووچە و دەرماڵەی پیشەیی و خێزان و منداڵ دەکەن، پیشبینیش دەکرێت لەگەڵ نزیکبوونەوەی کاتی هەڵبژاردنی پەرلەمانی عێراق بەرەی ناڕەزایەتی فەرمانبەرانیش بگرێتەوە.

ڕاگەیێنراوی فەرمی: نووری مالیکی، سەرۆکی هاوپەیمانی دەوڵەتی یاسا لە تویتێکدا لە پلاتفۆرمی ئێکس ڕایگەیاند: پاڵپشتی داواکارییەکانی پەروەردەکاران، فەرمانبەرانی خزمەتگوزاری، کرێکاران و چالاکوانی مافی مرۆڤ بۆ هەموارکردنەوەی مووچەکانیان دەردەبڕین.

-  پەیامی خۆپیشاندەران گەیشت و ترسیشمان هەیە لەلایەن کەسانێکەوە بۆ مەرامی تایبەتی و ئەجێندای دەرەکی بەلاڕێدا ببرێت.

ئەمەش بزانە: لەسەر ڕاسپاردەی لیژنەی پەروەردە، پەرلەمانی عێراق کۆبوونەوەیەکی نائاسایی ئەنجامدا و چەند پێشنیازێکی خستەڕوو، گرنگترینیان زیادکردنی مووچەی بنەڕەتی بۆ مامۆستایان بەڕێژەی 100% و زیادکردنی دەرماڵەی پیشەیی لە 150 هەزار دینارەوە بۆ 300 هەزار دینار.