سەرۆکی پەرلەمانی ئوردن سەردانی هەولێر دەکات

ئاڤا نیوز

بڕیارە ئەمشەو سەرۆک پەرلەمانی ئوردن لەگەڵ شاندێکی پەرلەمانی ئەو وڵاتە بگەنە هەولێر و سبەی دیداریان لەگەڵ سەرۆک بارزانی و سەرۆک وەزیران مەسرور بارزانی دەبێت.

وێنە گەورەکە: پەیوەندییەکانی نێوان هەرێمی کوردستان و ئوردن لە ئاستێکی پێشکەوتوودایە، ڕۆژی 19ـی یەکی ئەمسال مەسرور بارزانی، سەرۆکوەزیرانی کوردستان لەلایەن شا عەبدوڵڵای دووەم، پاشای ئوردن پێشوازی لێکرا.

زانیاری بەدەستهاتوو: ئاڤا میدیا زانیویەتی، ئەمشەو کاتژمێر 10:00 ئەحمەد سەفدی، سەرۆک پەرلەمانی ئوردن لەگەڵ شاندێک دەگەنە فڕۆکەخانەی نێودەوڵەتی هەولێر و لەلایەن شاخەوان عەبدوڵڵا، جێگری سەرۆک پەرلەمانی عێراق لە پشکی کورد پێشوازی لێ دەکرێت. دوای کۆبوونەوەیەکی کورتی پڕۆتۆکۆڵی لە فڕۆکەخانە، سبەی دیدارەکانی لەگەڵ بەرپرسانی هەرێمی کوردستان دەستپێدەکات.

زانیاریی زیاتر: وا بڕیارە سەرۆک پەرلەمانی ئوردن، لەگەڵ سەرۆک بارزانی و سەرۆکوەزیران مەسرور بارزانی کۆببێتەوە. هاوکات لەگەڵ سەرجەم کوتلەکانی پەرلەمان ئەوانەی دەنگی پێویستیان هێناوە کۆدەبێتەوە.

ئەوەی پێویستە بیزانیت: بەگوێرەی زانیارییەکانی ئاڤا، گرنگترین تەوەری کۆبوونەوەکانی سەرۆک پەرلەمانی ئوردن، بابەتی بازرگانی و پەروەردە دەبێت. بڕیارە سبەی شەممە دوای تەواو بوونی کۆبوونەوەکان بگەڕێتەوە بۆ وڵاتەکەی.