گرووپی شاخەوانی شەقڵاوە ساڵیادی دامەزراندنی لەسەر چیای سەفین دەکاتەوە

ئاڤا نیوز

 

لە ساڵیادی دامەزراندنیدا، گرووپی شاخەوانی شەقڵاوە لە ڕێگەی فێستیڤاڵی بەهارە، شاخەوانانی کوردستان لەسەر چیای سەفین کۆدەکاتەوە.

 

چیرۆکی سەرەکی: ڕۆژی شەممە ڕێککەوتی 27ـی 4ـی 2025, گرووپی شاخەوانی شەقڵاوە لە حەوتەمین ساڵیادی دامەزراندنیدا، فێستیڤاڵێکی بەهارەی لە کەمپی جۆتەدار لەسەر چیای سەفین ئەنجامدا، لە زۆربەی شارەکانی کوردستان گرووپەکانی شاخەوانی بەشداریی فێستیڤاڵەکەیان کرد و لەسەر چیای سەفین پەیامی پیرۆزبایی خۆیان گەیاندە گرووپی شاخەوانی شەقڵاوە.

 

ئەمەش بزانە: کەمپی جۆتەدار لەسەر چیای سەفین کە 1384 مەتر لە ئاستی ڕووی دەریا بەرزە، خاڵی بەیەک گەیشتنی شاخەوانان بوو.

زانیاریی زیاتر: جگە لە شاخەوانان ژمارەیەکی زۆر لەو کەسانەی ئارەزووی سەرکەوتن بەسەر چیا و تێکەڵاو بوون بە سروشت دەکەن، بەشداری ساڵیادەکەیان کرد.

 

لەلایەکی دیکە: گرووپی شاخەوانی شەقڵاوە، بەردەوام جگە لە شاخڕەوی، بەشداریی چەندین هەڵمەت و چالاکی ژینگەپارێزییان کردووە، ساڵانەش لە یادی دامەزراندنیدا بە فێستیڤاڵی بەهارە، شاخەوانانی کوردستان لە چیای سەفین کۆدەکاتەوە.