بۆ چارەسەرکردنی کێشە هەڵپەسێردراوەکان سوودانی بانگهێشتی ئیتاڵیا دەکرێت

ئاڤا نیوز

سەرۆکوەزیرانی عێراق بانگهێشتنامەیەکی فەرمی لەلایەن باڵیۆزی ئیتاڵیا لە عێراقەوە پێدەگات بە مەبەستی ئەنجامدانی ژمارەیەک ڕێککەوتننامەی ستراتیژی دووقۆڵی لە بوارەکانی ئابووری، ئەمنی، سەربازی و کەلتوری و چارەسەرکردنی کێشە هەڵپەسێردراوەکانیانی نێوان هەردوو وڵات.

 

چیرۆکی سەرەکی: محەممەد شیاع سوودانی، سەرۆکوەزیرانی عێراق پێشوازی لە نیکۆلۆ فۆنتانا، باڵیۆزی ئیتاڵیا لە عێراق کرد و گفتوگۆ لەسەر بەهێزکردنی پەیوەندییە دووقۆڵییەکان و پەرەپێدانی هاوکاری هاوبەش بۆ بەرژەوەندی هەردوو وڵاتی دۆست کرا.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، سوودانی جەختی لەسەر ئیرادەی حکومەت کردەوە بۆ تەواوکردنی ئەوەی کە لەنێوان ئەو و جۆرجیا میلۆنی، سەرۆکوەزیرانی ئیتاڵیا لە کاتی سەردانە فەرمییەکەی بۆ عێراق لە کۆتایی ساڵی 2022 دا ڕێککەوتن لەسەری.

 

. باڵیۆزی ئیتاڵیا بانگهێشتنامەی فەرمی سەرۆکوەزیرانی ئیتاڵیای پێشکەش بە سوودانی کرد بۆ سەردانیکردنی ئیتاڵیا، بە مەبەستی ئەنجامدانی ڕێککەوتننامەی ستراتیژی دووقۆڵی لە بوارەکانی ئابووری، ئەمنی، سەربازی و کەلتوری، هاوکات چارەسەرکردنی کێشە هەڵپەسێردراوەکان لە نێوان هەردوو وڵات کە لە ساڵانی هەشتاکانەوە هەیە. ئاماژەی بەوەش کرد کە هاوکاری نێوان عێراق و ئیتاڵیا بنەڕەتی و سەرەکییە بۆ جێگیرکردنی سەقامگیری لە ناوچەکە و جیهاندا.

 

ئەوەی پێویستە بیزانیت: گرنگترین کێشەکانی نێوان ئەو دوو وڵاتە پەیوەندی بە بازرگانی چەک و پڕۆژە سەربازییەکانەوە هەبوو. لە ساڵانی هەشتاکاندا، ئیتاڵیا یەکێک بوو لەو وڵاتانەی کە چەک و تەکنەلۆژیای سەربازی بە عێراق دەفرۆشت لە کاتی شەڕی عێراق-ئێراندا.

- کێشەی قەرزەکان: عێراق قەرزی زۆری لەسەر کۆمپانیا ئیتاڵییەکان کەڵەکە بوو، بە تایبەتی دوای تەواوبوونی شەڕی عێراق-ئێران و دواتر داگیرکردنی کوەیت، کە بووە هۆی گەمارۆی نێودەوڵەتی لەسەر عێراق.

- پرۆژە ناتەواوەکان: چەندین پرۆژەی گەورەی ژێرخان کە کۆمپانیا ئیتاڵییەکان لە عێراقدا دەستیان پێکردبوو، بە هۆی شەڕ و قەیرانی داراییەوە ناتەواو مانەوە.

- بەندەری فاو: یەکێک لە گرنگترین پرۆژەکانی نێوان هەردوو وڵات، پەرەپێدانی بەندەری فاو بوو، کە بە هۆی شەڕەوە ڕاگیرا.

- ئەم پرسانە لە دوای ڕووخانی ڕژێمی بەعس لە ساڵی 2003دا، بەشێک بوون لە گفتوگۆکانی نێوان عێراقی نوێ و ئیتاڵیا.