ئەنجوومەنی ئاسایشی هەرێمی کوردستان: گرووپێکی تیرۆرستی هێرشە درۆنییەکەی ئەنجام داوە

ئاڤا نیوز

 

لەبارەی هێرشە درۆنییەکەی ئەمڕۆ و دوێنێ کە بنکەکانی هێزی پێشمەرگەی لە دهۆک بە ئامانج گرتووە، ئەنجوومەنی ئاسایشی هەرێمی کوردستان ڕاگەیێنراوێکی بڵاوکردەوە، بە گوێرەی ڕاگەیێنراوەکە "گرووپێکی تیرۆرستی هێرشەکەی" کردووە.

 

چیرۆکی سەرەکی: ڕۆژی دووشەممە ڕێککەوتی 28ـی 4ـی 2025, درۆنێک خۆی کێشا بنکەیەکی هێزەکانی پێشمەرگە و سێ پێشمەرگە بریندار بوون. سەرلە بەیانیی ئەمڕۆش درونێکی دیکە خۆی کێشا بە بنکەیەکی هێزەکانی پێشمەرگە لە پارێزگای دهۆک و دوو پێشمەرگە  بریندار بوون.

 

ڕاگەیێنراوی فەرمی: ئەنجوومەنی ئاسایشی هەرێمی کوردستان ڕایگەیاند: "گرووپێکی تیرۆریستی هێرشەکەیان ئەنجامداوە و پێنج پێشمەرگە بریندارن، بارودۆخی بریندارەکان باشە".

 

زانیاریی زیاتر: لە ڕاگەیێنراوەکەدا هاتووە، "لە کاتێکدا کە پرۆسەی ئاشتی لە باکوور و کۆنفرانسی یەکێتیی لایەنە کوردستانییەکان لە ڕۆژئاوا و پرۆسەی پێکهێنانی کابینەی نوێی حکومەتی هەرێمی کوردستان خەریکە بە ئەنجام دەگات، هەندێ لایەن و گرووپ هەوڵ دەدەن پرۆسەی ئاشتی و سەقامگیری لە دەڤەرەکەدا پەک بخەن.

 

ئەوەی پێویستە بیزانیت: وێڕای سەرکۆنەکردنی هێرشەکە، ئەنجوومەنی ئاسایش هۆشداری دەداتە "هەموو ئەو گرووپ و لایەنانەی ئاسایشی هەرێمی کوردستان دەکەنە ئامانج".

لەلایەکی دیکە: بەگوێرەی ڕاگەیێنراوەکەی ئەنجوومەنی ئاسایش، هێزی پێشمەرگە و هێزەکانی ئاسایشی ناوخۆ ئامادەن بۆ کاردانەوەی گونجاو بەرامبەر هەر هێرشێکی "تێکدەرانە".