دۆناڵد ترەمپ: متمانە بە پووتین ناکەم

ئاڤا نیوز

 

سەرۆکی ئەمریکا سەرەڕای ئەوەی ویستی دانوستاندن و ئاشتی لەگەڵ ڕووسیا دەردەبڕێت بەڵام ڕایدەگەیەنێت ناتوانێت  "متمانە بە ڤلادیمێر پووتین بکات".

 

وێنە گەورەکە: ئاسایکردنەوەی پەیوەندییەکانی نێوان واشنتن و مۆسکۆ و کۆتاییهێنان بە جەنگی نێوان ڕووسیا و ئۆکراینا، دوو ئامانجی سەرەکی دۆناڵد ترەمپ، سەرۆکی ئەمریکان و بەو ئاراستەیەشدا لەگەڵ دووبارە دەستبەکاربوونەوەی لە کۆشکی سپی، ویستی کۆبوونەوە و دانوستاندنی لەگەڵ ڕووسیا ڕاگەیاند، لە ماوەی 100 ڕۆژی سەرۆکایەتیدا، ڕووسیا دوو ئاگربەستی کاتی ڕاگەیاند و هەنگاوەکان بە ئاراستەی کەمکردنەوەی گرژی و ناکۆکیەکان دەڕۆن.

 

لێدوانی فەرمی: دۆناڵد ترەمپ، سەرۆکی ئەمریکا لە وەڵامی پرسیاری ڕۆژنامەنوساندا سەبارەت بە ڕووسیا و ڤلادیمێر پووتین ڕایگەیاند: "دەبێت ئەوە بزانن کە ڤلادیمێر پووتین خەونی داگیرکردنی هەموو ئۆکراینای هەبوو، بەڵام ئێستا بەهۆی منەوە دەستبەرداری ئەو خەونە بووە و پێموایە ئەویش وەکو من ئاشتی دەوێت بەڵام بۆ بەدیهێنانی ئەو ئامانجە دەبێت ئاگربەست ڕابگەیێنێت و جەنگ کۆتایی پێبهێنرێت."

 

زانیاریی زیاتر: دۆناڵد ترەمپ، سەرۆکی ئەمریکا سەبارەت بە متمانەکردنی بە ڤلادیمێر پووتین گوتی، "هەرچەندە ڤلادیمێر پووتین ئامادەیی بۆ ڕێککەوتنامەی ئاشتی دەربڕیووە بەڵام هەنگاوەکان زۆر بە سستی دەڕۆن و ناتوانم بڵێم متمانە بە ڤلادیمێر پووتین دەکەم، من "متمانە بە زۆر کەس ناکەم".