کاتی وەرگرتنی گەنمی جووتیارانی هەرێمی کوردستان دیاری دەکرێت

ئاڤا نیوز

 

پرۆسەی وەرگرتنی گەنم لە شارەکانی خوارووی عێراق دەستی پێکردووە، بریکاری وەزارەتی بازرگانی و پیشەسازی هەرێمی کوردستانیش دەڵێت، "لە کۆتایی مانگی پێنج، ئێمەش دەست بە وەرگرتنی گەنم دەکەین".

 

وێنە گەورەکە: دوو هەفتەیە لە پارێزگاکانی باشووری عێراق دەست بە وەرگرتنی گەنمی جووتیاران کراوە، بەهۆی گەرماوە گەنم لەو شارانە زووتر پێگەیشتووە و دووراوەتەوە.

 

لێدوانی فەرمی: سەروەر هاواری، بریکاری وەزارەتی بازرگانی و پیشەسازیی هەرێمی کوردستان بە ئاڤا میدیای ڕاگەیاند: بەگوێرەی پلانی ساڵی 2025، عێراق بڕی 400 هەزار تۆن گەنم لە هەرێمی کوردستان وەردەگرێت، ئێمەش بەم بڕە ڕازی نین و لەوبارەیەوە پەیاممان بۆ بەغدا ناردووە".

 

لەبارەی کاتی وەرگرتنی گەنمی جووتیاران، سەروەر هاواری گوتی، لە 25-5-2025 تا 1-6-2025 دەست بە وەرگرتنی گەنمی جووتیارانی هەرێمی کوردستان دەکەین.

 

ژمارەکان وا دەڵێن: لە ساڵی 2023، بڕی 500 هەزار تۆن گەنم و لە ساڵی 2024 بڕی 700 هەزار تۆن گەنمی جووتیارانی هەرێمی کوردستان لەلایەن عێراقەوە وەرگیرا.

 

ئەوەی پێویستە بیزانیت: ئەمساڵ بۆ هەر تۆنێک گەنمی بەراو 850 هەزار دینار و بۆ گەنمی دەیمی 800 هەزار دینار لەلایەن وەزارەتی بازرگانیی عێراقەوە دیاری کراوە.