600 هەلی كار بۆ گەنجان دەڕەخسێنرێت

ئاڤا نیوز

پێشانگای هەلی كار لە سلێمانی، كە بەڕێوەبەرایەتی كار و دەستەبەری كۆمەڵایەتی ڕێكیخستبوو، 600 هەلی كاری بۆ كارخوازان ڕەخساند.

چیرۆکی سەرەکی: لە شاری سلێمانی پێشانگای هەلی كار بە بەشداریی 35 كۆمپانیا لە بوارەكانی تەندروستیی، تەلارسازی، ئای تی و چەند بوارێكی دیكە، سازكرا، كە وەزارەتی كار و كاروباری كۆمەڵایەتیی هەرێمی كوردستان بەهەماهەنگی زانكۆی پۆلیتەكنیكی سلێمانی و بە سپۆنسەری ڕێكخراوی كاری نێودەوڵەتی ڕێكیخستبوو، تێیدا ژمارەیەكی زۆری هاووڵاتیان سەردانییان كرد.

ڕاگەیێنراوی فەرمی: بەپێی ڕاگەیێنراوی بەڕێوەبەرایەتی كار و دەستەبەری كۆمەڵایەتیی سەر بە وەزارەتی كاری حكومەتی هەرێمی كوردستان، ئەم پێشانگایە دەرفەتێك بوو بۆ ئەوەی كوڕان و كچانی دەرچووی زانكۆ و پەیمانگەكان، CV خۆیان پێشكەش بە كۆمپانیاكان بكەن و لە ماوەی یەك ڕۆژی كردنەوەی پێشەنگاكەش، زیاتر لە 600 هەلی كار بۆ گەنجان ڕەخسا.

ئەوەی پێویستە بیزانیت: بەڕێوەبەرایەتی كار و دەستەبەری كۆمەڵایەتیی ئاماژە بەوەش دەكات، ئەوانەشی بەهەر هۆكارێك بێت نەیانتوانیوە سەردانی پێشانگاكە بكەن، دەتوانن لەڕێگەی پۆرتاڵی هەلی كار لە وەزارەتی كار و كاروباری كۆمەڵایەتی داواكاریی بۆ دۆزینەوەی كار پێشكەش بكەن.