ڕووسیا: ئۆکراینا بە فڕۆکەی بێفڕۆکەوان هێرشی کردووەتە سەر مۆسکۆ

ئاڤا نیوز

 

بەرەبەیانی ئەمڕۆ دووشەممە سەرۆکی شارەوانی مۆسکۆ ڕایگەیاند، سیستمی بەرگری ئاسمانی ڕووسیا 26 فڕۆکەی بێفڕۆکەوانی ئۆکرانیایان تێکشکاندووە کە بەسەر ئاسمانی  پایتەختی ڕووسیا دەسوڕانەوە.

وێنە گەورەکە: سەرەڕای هەوڵەکانی ئەمریکا بۆ ڕاگرتنی شەری سێ ساڵەی ڕووسیا و ئۆکراینا، بەڵام هەردوو وڵات بەردەوام یەکتر تۆمەتبار دەکەن بە هێرشکردن و تێکدانی هەر هەوڵێک بۆ ئاشتی، بەرەبەیانی ئەمڕۆش ڕووسیا ڕایگەیاند، ئۆکراینا بە فڕۆکەی بێ فڕۆکەوان هیڕشی کردە سەر مۆسکۆ.

ڕاگەیێنراوی فەرمی: دەزگای گواستنەوەی ئاسمانی  ڕووسیا ڕایگەیاند: بەپێی ڕاپۆرتە سەرەتاییەکان هیچ زیانێکی گیانی بەهۆی تێکشکاندنی ئەو فڕۆکە بێ فڕۆکەوانانە نەبووە، بەڵام بەهۆی ئەم هێرشانەوە بۆ ماوەیەکی کاتی  فڕۆکەخانەی سەرەکی مۆسکۆ داخرا.

قووڵتر: کرێملین پێشنیازی ئاگربەستێکی سێ ڕۆژەی کردووە کە هاوکات بێت لەگەڵ یادی 9ی ئایار لە ڕووسیا، بەڵام، ڤۆلۆدیمیر زێلێنسکی، سەرۆکی ئۆکراینا ڕۆژی یەکشەممە ڕایگەیاند، باوەڕی بە ڕێزگرتنی  ڕووسیا بۆ  ئاگربەستی داهاتوو نییە کە هاوکاتە لەگەڵ ئاهەنگەکانی ڕۆژی سەرکەوتنی مۆسکۆ.

زانیاریی زیاتر: لە مانگی ئازاردا مۆسکۆ ئاگربەستێکی 30 ڕۆژەی ڕەتکردەوە کە لەلایەن کیێڤ و واشنتنەوە پێشنیاز کرابوو.