شەوی ناساندنی وان لە هەولێر بەڕێوەدەچێت

ئاڤا نیوز

بەمەبەستی ناساندنی کولتوور و خوانەکانی وان، ژووری بازرگانیی و پیشەسازی وان لە شاری هەولێر چالاکییەکی کولتووری و ڕۆشنبیری ڕێکخست.

 

چیرۆکی سەرەکی: لە چالاکی 'شەوی ناساندنی وان'ـدا کە لە شاری هەولێر بەڕێوەچوو، هەریەک لە ئایدن مەعروف، وەزیری کاروباری پێکهاتەکان و ئەندامی مەکتەبی سیاسیی بەرەی تورکمانی، ئومێد خۆشناو، پارێزگاری هەولێر، ئەرمان تۆپچو، کونسوڵی گشتیی تورکیا لە هەولێر، و بەپرسانی ژوورەکانی بازرگانی و پیشەزازی وان و هەولێر و کەسایەتيیە سیاسییەکان و هاووڵاتیان بەشداربوون.

 

لێدوانی فەرمی: ئومێد خۆشناو، پارێزگاری هەولێر بە ئاڤای ڕاگەیاند، وان شارێک نییە خۆی بناسێنێت، بەڵکو براندێکی ناسراوە، جگە لە کولتور و خوانی ئەو شارە، لەڕووی وێژەییەوە دەیان هۆزانڤان و شاعیرەی گەورەی کورد لەو شارە هەڵکەوتوون، سروشتی جوانی شارەکەش زیاتر ناساندوویەتی.

 

- پارێزگاری هەولێر، دەستخۆشی لە کونسوڵگەری گشتیی تورکیا لە هەرێمی کوردستان کرد کە لە پەرەپێدانی بابەتە کولتووری و کۆمەڵایەتی و بازرگانییەکان، ڕۆڵی بەرچاوی هەبووە، بەردەوامیش هەوڵدەدات پەیوەندییەکانی تورکیا و هەرێمی کوردستان لەسەرجەم بوارەکاندا بەهێز بێت.

 

زانیاریی زیاتر: لەم چالاکییەدا لە ڕێگەی نمایشێکی ڤیدیۆیی و موزیکەوە، کولتوور و خوانی وان ناسێندرا، هاوکات خوانی تایبەت بە وان پێشکەش بە میوانەکان کرا، جگە لە ناساندنی مێژوو و جوگرافیا بەتایبەت شوێنە گەشتیارییەکانی وان.

 

بۆچی گرنگە: ئامانج لە ڕێکخستنی ئەمجۆرە چالاکییە فەرهەنگییانە، بەهێزکردنی پەیوەندییەکانی نێوان هەرێمی کوردستان و پارێزگای وانە بەتایبەت لە سێکتەری گەشتوگوزار و سوود وەرگرتن لە ئەزموونی هەمەلایەن.