چین زەمالەی خوێندن بە هەرێمی کوردستان دەبەخشێت

ئاڤا نیوز

وەزارەتى خوێندنى باڵا و توێژینەوەى زانستى ڕایگەیاندووە، وڵاتی کۆماری میللی چین زەمالەی خوێندنی ماستەر و دکتۆرای بە مامۆستا و فەرمانبەران و هاونیشتمانیانی هەرێمی کوردستان دەبەخشێت، بەڵام بە کۆمەڵێک مەرج.

وێنە گەورەکە: کورسی خوێندن، لەلایەن زانکۆی وڵاتانەوە دابین دەکرێت و دەبەخشرێت بە وڵاتانی دیکە، ئەمەش لە پێناو ئاسانکاری و سوودبینین لە توانای زانستی ئەو زانکۆیانە. وڵاتی بەخشەر تێچووی خوێندنەکە دابین دەکات.

ڕاگەیێنراوی فەرمی: وەزارەتی خوێندنی باڵا و توێژینەوەی زانستی دەڵێت: زەمالەى خوێندنى ماستەر و دكتۆرا (MOFCOM- CSC) لەلایەن چینەوە دابینکراوە و پێشکەش بە هەرێمی کوردستان کراوە، بەڵام کۆمەڵێک مەرج و ڕێنمایی دیاریکراوە. 2025-05-18، دوا وادەیە بۆ پێشکەشکردنی داواکارییەکە.

چین بۆ خوێندنی ماستەر و دکتۆرا ئەم مەرجانەی دیاریکردووە:

٠ پێویستە داواکار دانیشتووی هەرێمی کوردستانی عێراق و هەڵگری ڕەگەزنامەی عێراقی بێت.

٠ داواکار دەبێت تەمەنی لە 45 ساڵ کەمتر بێت و ڕەوشی تەندروستی باش بێت.

٠ فەرمانبەرى دامودەزگاکانی حکومەتی هەرێمی کوردستان كە دوو ساڵ خزمەتی هەیه‌، هانده‌درێت بۆ پێشكه‌ش كردنی ئه‌م زه‌ماله‌یه‌.

وەزارەتی خوێندنی باڵا دەڵێت داواکار پێویستە ئەم  دۆکیۆمێنتانە ئامادە بکات:

٠ پێویستە بڕوانامەی دەرچوون ئامادە بکەیت کە پشراستکرابێتەوە لە لایەن وەزارەتی خوێندنی باڵا، وەزارەتی داد، فەرمانگەی پەیوەندییەکانی دەرەوە و نوسینگەی پشتراستکردنی بروانامەکانی سەر بە وەزارەتی دەرەوەی عێراق لە هەرێمی کوردستان.

٠ بڕوانامەی بە نمرە بە هەمان شێوەی خالی یەکەم.

٠ بڕوانامەی تایبەت بە نەبوونی پێشینەی تاوان و ئەستۆپاکی کە لە لایەن وەزارەتی داد و فەرمانگەی پەیوەندییەکانی دەرەوە پشتڕاستکرابێتەوە.

٠ بڕوانامەی تەندروستی کە لە لایەن وەزارەتی تەندروستی، وەزارەتی داد، فەرمانگەی پەیوەندییەکانی دەرەوە و نوسینگەی پشتراستکردنی بڕوانامەی سەر بە وەزارەتی دەرەوەی عێراق لە هەرێمی کوردستان پشتڕاستکرابێتەوە.

٠ تێستی زمانی ئینگلیزی وەک تۆیفل و ئایڵتس ئەگەر یەکێکیانی هەبێت ئامادەی بکات.

٠ دوو نووسراوی (Recommendation) لە لایەن مامۆستایانی زانکۆکەی یا لە شوێنی کار ئامادە بکرێت.

٠ پاسپۆرتی داواکار مەرجە ماوەی بەسەرچوونی لە شەش مانگ کەمتر نەبێت.

٠ سی ڤی و پێرسنەل ستەیتمێنتی داواکار.

مەرجە سەرەکییەکان: مەرجەکانی وەزارەتی خوێندنی باڵا بۆ ماستەر ئەمانەن:

٠ دانیشتووی هەرێمی کوردستان بێت.

٠ فەرمانبەر و مامۆستا، دوو ساڵ خزمەت بەسەر دواین بڕوانامەی تێپەڕ بووبێت.

٠ کۆنمرەی بەکالۆریۆسی لە 65 کەمتر نەبێت.

٠ ئاستی توانستی زمانی داواکراو لە بەرنامەیەک بۆ بەرنامەیەک جیاوازە.

٠ دەبێت لە هەمان بواری بەکالۆریۆسەکەی داواکاری خوێندن پێشکەش بکات.

٠ ئەوەی ناوی دەردەچێت ئەگەر فەرمانبەر و مامۆستا بێت تەنیا مۆڵەت و مووچەی بنەڕەتی و دەرماڵە جێگیرەکانی بۆ خەرج دەکرێت.

٠ چین تێچووی خوێندنەکەی لە ئەستۆ دەگرێت.

بۆ خوێندنی دکتۆرا ئەم مەرجانە دیاریکراون:

٠ دانیشتووی هەرێمی کوردستان بێت.

٠ فەرمانبەر و مامۆستا، دوو ساڵ خزمەت بەسەر دواین بڕوانامەی تێپەڕ بووبێت و بۆ دەرچووانی تواناسازی پێنج ساڵ خزمەتییان هەبێت.

٠ کۆنمرەی ماستەری لە 70 کەمتر نەبێت.

٠ مەرجەکانی دیکە هەمان مەرجی خوێندنی ماستەرن.

٠ داواکار تەنیا لەڕێگەی ئەم ماڵپەڕەوە داواکاری پێشکەش دەکات maqsood.mohammed@mhe-krg.org