کۆمیسیۆن: تا ئێستا پێنج هاوپەیمانیێتی نوێ بۆ هەڵبژاردن تۆمارکراون

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایدەگەیێنێت، ژمارەی ئەو حیزبانەی کە سەرقاڵی نوێکردنەوە و خۆتۆمارکردنن بۆ هەڵبژاردن، دەگاتە 61 حیزب. تاوەکو ئێستاش پێنج هاوپەیمانیێتی نوێ تۆمارکراون.

وێنە گەورەکە: لە چوارچێوەی ئامادەکارییەکانی کۆمیسیۆنی باڵای سەربەخۆی هەڵبژاردنەکان، دەرگای تۆمارکردنی هاوپەیمانی و حیزب و کاندیدانی سەربەخۆ بۆ بەشداریکردن لە هەڵبژاردن لە 4ـی ئایار بۆ 14ـی ئایار درێژ کردەوە، پرۆسەکە بەردەوامە.

لێدوانی فەرمی: جومانە غەلای، وتەبێژی کۆمیسیۆنی باڵای هەڵبژاردنەکانی عێراق، ڕاگەیاند، "کۆی حیزبە سیاسییە ڕێگەپێدراو و تۆمارکراوەکان لای کۆمسیۆن گەیشتووەتە 335 حیزب، لەوانە زیاتر لە 100 حیزبی سیاسی کۆن ئارەزووی بەشداریکردنیان لە هەڵبژاردنەکاندا دەربڕیوە.

ژمارەکان وادەڵێن: 

. ژمارەی ئەو حیزبانەی سەرقاڵی نوێکردنەوە و خۆتۆمارکردنن بۆ هەڵبژاردن، گەیشتووەتە 61 حیزب.

. ژمارەی ئەو هاوپەیمانیێتییانەی کە ئارەزووی بەشداریکردنیان لە هەڵبژاردنەکان دەربڕیوە و لای بەشی کاروباری حیزب و ڕێکخراوە سیاسییەکان لە کۆمیسیۆندا تۆمار کراون گەیشتووەتە 66 هاوپەیمانیێتی.

. شەش لە هاوپەیمانیێتییەکان زانیارییەکانیان نوێ کردووەتەوە.

. پێنج هاوپەیمانی نوێش تۆمارکراون.

ئەوەی پێویستە بیزانیت: بڕیارە لە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، ئامادەکارییەکان لەلایەن کۆمیسیۆنەوە بەردەوامە.